२०८३ आश्विन २६, सोमबार

पेट्रोलको मूल्य जुम्लामा १३०

नमुना पोष्टप्रकाशित मिति: २०७५ पौष २२, आईतबार (७ साल अघि)

जुम्ला । जुम्लामा झण्डै डेढदशकपछि पहिलो पटक पेट्रोलियम पदार्थको मूल्य निर्धारण गरिएको छ । पेट्रोलियम पदार्थको मूल्यमा एकरुपता नहुँदा जुम्लाको यातायात क्षेत्र प्रभावित भएको निश्कर्ष निकाल्दै जिल्ला प्रशासन कार्यालय जुम्लाले पेट्रोलियम पदार्थको मूल्य निर्धारण गरेको हो । प्रमुख जिल्ला अधिकारी विष्णु पौडेलको अध्यक्षतामा बसेको सर्वपक्षीय सर्वदलीय बैठकले पहिलो पटक जुम्लाको पेट्रोलियम पदार्थको मूल्य निर्धारण गरेको छ।
निर्धारित मूल्य अनुसार पेट्रोलको मूल्य प्रति लिटर १३० रुपैयाँ कायम गरिएको छ । त्यस्तै डिजेलको प्रति लिटर रु ११५ तोकिएको प्रमुख जिल्ला अधिकारी पौडेलले जानकारी दिए ।
यसअघि पेट्रोल १५० र डिजेल १३० रुपैयाँ प्रतिलिटरसम्ममा किनबेच भइरहेको थियो । मूल्य निर्धारणसँगै अब जताततै पेट्रोलियम पदार्थको कारोबार नहुने प्रजिअ पौडेलले बताए । विसं २०६२ मा कर्णाली राजमार्ग शुरु भएदेखि हालसम्म पेट्रोलियम पदार्थमा भइरहेको महङ्गी र कालोबजारी बारे कसैको ध्यान पुग्नसकेको थिएन ।पेट्रोलियम पदार्थ ल्याउने ट्याङ्करको भाडा, अहिलेको मूल्य, मजदूर ज्याला, छिमेकी जिल्लाको मूल्यलाई विश्लेषण गरेर पेट्रोलियम पदार्थको मूल्य तोकिएको हो । बैठकले गरेको पेट्रोलियम पदार्थ सम्बन्धीको निर्णय कार्यान्वयन नगर्ने जो सुकैलाई कारवाहीको दायरामा ल्याइने प्रशासनले चेतावनी दिएको छ ।