चितवन महोत्सव आजदेखि, प्रचण्डले समुद्घाटन गर्ने

चितवन। १२ औं चितवन महोत्सव आज (बुधबार)देखि सुरु हुँदैछ । उद्योग वाणिज्य संघ–चितवन, भरतपुर महानगरपालिका र जिल्ला समन्वय समिति चितवनको संयुक्त आयोजनमा हुन लागेको महोत्सवको आज एक औपचारिक समारोहकाबीच पूर्व प्रधानमन्त्री एवंम नेकपाका अध्यक्ष पुष्पकमल दाहाल ‘प्रचण्ड’ले समुद्घाटन गर्ने कार्यक्रम रहेको छ । समुद्घाटन अघि निकालिने शोभायात्रामा ३०० भन्दा बढी संघसंस्था सहभागि हुने भएका छन् ।

प्रदर्शनी स्थल नारायणी नदी किनारमा हुन लागेको महोत्सवको सबै तयारी पुरा भईसकेको छ । निकै आकर्षक साजसजावटसहित तयार पारिएको नारायणी नदीकिनारको प्रदर्शनी स्थलमा यस पटक ५ सय ९० वटा स्टल रहेका छन् । स्टल धेरै भएकाले परिसर विगतमा भन्दा फराकिलो बनाइएको छ ।

महोत्सव परिसर प्रवेश द्धार देखिनै यस संस्करणको भव्यता देख्न पाइनेछ । १२ औं संस्करणको महोत्सवलाई भ्रमण वर्ष २०२० लक्षित गर्दै गर्दा प्रवेशद्धारमा पनि त्यसको झल्को देख्न सकिन्छ । चितवनका १० पर्यटकिय गन्तव्यको तस्विर सहितको जानकारी प्रवेशद्धारमा राखिएको छ । चितवन महोत्सव परिसरबाट नगरवनसम्म जिप सफारीको समेत व्यवस्था गरिएको छ ।

महोत्सवमा हरेक संस्करणमा आकर्षणको केन्द्र बन्ने आदिवासी जनजातीको पहिचान झल्कने नमुना घरहरुको निर्माण र प्रदर्शनले यस पटक पनि निरन्तरता पाएको छ । आदिवासी जनजाती महासंघ चितवनको संयोजनमा महोत्सव स्थल नारायणी नदी किनारमा आदिवासी जनजातीको पहिचान झल्कने घर निर्माण गरिएका छन् । घरमा आदिवासीको रहनसहन, उनीहरुले प्रयोग गर्ने भाँडा वर्तन, सांस्कृतिक पहिचान झल्कने भेषभूषा समेत प्रर्दशनीका लागि राखिने छन् । यस पटकको महोत्सवमा चेपाङ, कुमाल, बोटे र दराई जातीको पहिचान झल्कने घर निर्माण गरिएको छ ।

२०५३ सालदेखि दुई वर्षको अन्तरालमा महोत्सव आयोजना हुँदै आएको छ । यस पटक महोत्सव करिव ५ लाख दर्शकले अवलोकन गर्ने लक्ष्य लिइएको छ । माघ ४ गतेसम्म चल्ने महोत्सवमा करिव २५ करोडको कारोबार हुने अनुमान गरिएको छ ।

http://narayanionline.comबाट