मध्यरातमा हेलिकोप्टरमार्फत डा. केसीलाई काठमाडौं ल्याइयो

काठमाडौं । चिकित्सा शिक्षा सुधारको माग गर्दै इलाममा सत्याग्रहमा बसेका डा.गोविन्द केसीको स्वास्थ्य गम्भीर बनेपछि हेलिकोप्टरमार्फत काठमाडौं ल्याइएको छ । चिकित्सा शिक्षा सुधारसहित विभिन्न माग राखेर उनी नौ दिनदेखि इलाममा १६ औं सत्याग्रहमा थिए । उनलाई बिहान ३ बजे नेपाली सेनाको हेलिकोप्टरमार्फत काठमाडौं ल्याइएको हो । डा. केसी काठमाडौं आइपुगे पनि आईसीयूमा भर्ना हुन मानेका थिएनन् । उनी यसअघि अनशन बस्दै आएको स्थानमै अनशनमा बस्ने अडानमा थिए ।

तर उनलाई इलाम पुगेको टोलीले विशेष आग्रह गरेपछि आईसीयूमा लगिएको थियो । डा. केसी समूहका सदस्य डा. अभिषेक सिंहका अनुसार बिहान ३ बजे काठमाडौं ल्याइपुर्याइएको हो । इलामबाट भद्रपुरसम्म एम्बुलेन्स र त्यहाँबाट नेपाली सेनाको हेलिकोप्टरमा उनलाई काठमाडौं ल्याइएको थियो ।