शैक्षिक सुधारका लागि नवलपुरमा कार्यशाला

बिजय चालिसे
कावासोती । पूर्बि नवलपरासी नवलपुरका सामुदायिक विद्यालयहरुको शैक्षिक सुधारका लागि २ दिने अन्तरकृया कार्यक्रम कासोतीमा सुरु भएको छ । सामाजिक विकास मन्त्रालय गण्डकी प्रदेशको आयोजना एंव शिक्षा विकास तथा समन्वय ईकाई नवलपुरको संयोजनमा आजबाट सुरु भएको अन्र्तरकृया भोली सम्म चल्नेछ ।
कावासोती नगरपालिका र देवचुली नगरपालिकाको १/१, मध्यविन्दु नगरपालिकाका २ तथा बुलिङटार गाँउपालिकको एक विद्यालयका विद्यालय व्यबस्थापन समितिका अध्यक्ष, शिक्षक अभिभावक संघका अध्यक्ष, प्रधानाध्यापक लगायतको सहभागितामा सुरु भएको कार्यशालामा उत्कृष्ट नतिजा दिईरहेका विद्यालयका अनुभव साटासाट गरि कमजोर नतिजा दिने विद्यालयको शैक्षिक गुणस्तर कसरी सुधार गर्न सकिन्छ भन्ने विषयमा ठोस योजना तयार पार्ने अन्तरकृयाको मुख्य उद्धेश्य रहेको शिक्षा विकास तथा समन्वय ईकाई नवलपुरका प्रमुख कृष्णचन्द्र पोखरेलले जानकारी दिए । अन्तरकृया कार्यक्रमको उद्घाटन समारोहमा सहभागि प्रमुख अतिथी एंव कावासोती नगरपालिका प्रमुख चन्द्रा कुमारी पुनले पछिल्लो समय सामुदायिक विद्यालयहरुको अध्ययनले बेरोजगारी निम्त्याएकाले अव प्राविधिक शिक्षामा जोड दिन आवश्यक रहेको बताईन् । सामुदायिक विद्यालयहरुको शैक्षिक सुधारका लागि कस्तो प्रकारको शैक्षिक कार्यक्रम ल्याउनु उचित हुन्छ, यस्ता कुरालाई पहिचान गरी शैक्षिक कार्यक्रम ल्याउनु आवश्यक रहेकोमा नगर प्रमुख पुनको जोड थियो ।

त्यसैगरी नवलपुरको विकट पहाडी क्षेत्र बुलिङटार गाँउपालिकाका अध्यक्ष शशिकिरण बस्ताकोटीले शिक्षाको क्षेत्रमा बुलिङटार सबैभन्दा कमजोर रहेको भन्दै चिन्ता व्यक्त गरे । उनले बुलिङटारमा ४४ वटा विद्यालय रहेको जानकारी दिदै प्राय सबै विद्यालयको शैक्षिक गुणस्तर खस्कदै गएको बताए । बिशेष गरि विद्यार्थी नभएका विद्यालयमा दरबन्दि पर्ने तर विद्यार्थी भएका विद्यालयलाई वेवास्ता गरिएका कारण पनि शैक्षिक गुणस्तरमा सुधार ल्याउन नसकिएको उनले आरोप लगाए । उद्घाटन कार्यक्रममा सामाजिक विकास मन्त्रालय गण्डकी प्रदेशका उप–सचिव तेज प्रसाद काफ्लेले यस्तो खालको अन्तरकृया कार्यक्रम अहिलेसम्म प्रदेशका ४ वटा जिल्लामा गरिएको जानकारी दिदै शिक्षा क्षेत्रको लगानि वालुवामा पानी खन्याएको जस्तो भनेर गुनासो आउन थालेकाले अन्तरकृया मार्फत शैक्षिक सुधार ल्याउन सकिने धारणा राखे । उद्घाटन कार्यक्रमको अध्यक्षता गरेका शिक्षा विकास तथा समन्वय ईकाई नवलपुरका प्रमुख कृष्णचन्द्र पोखरेलले स्थानिय सरकार र शिक्षा विकास समन्वय गरेर अगाडी बढे केहि हदसम्म भएपनि सामुदायिक विद्यालयको शैक्षिक गुणस्तरमा सुधार ल्याउन सकिने विचार व्यक्त गरे । देवचुली नगरपालिकाका शिक्षा शाखा प्रमुख मोती रिजालले सञ्चालन गरेको कार्यक्रममा मध्यविन्दु नगरपालिका शिक्षा शाखा प्रमुख टेक प्रसाद पाण्डेले स्वागत मन्तव्य राखेका थिए । दुई दिने अन्तरकृया कार्यक्रबाट शैक्षिक सुधारका लागि ठोस कार्ययोजा तयार पारि नवलपुरका सबै स्थानिय तहमा परिपत्र गरिने ईकाई प्रमुख पोखरेलले जानकारी दिए ।