किशोरीहरुको परिवर्तन : स्वयम किशोरीहरुको सहभागिताबाट

कावासोती । समुदायमा रहेका किशोरीहरुको समस्याहरुको पहिचान गर्दै त्यसको समाधान पनि सँगै गर्नुपर्दछ भन्ने विश्वासमा देवचुली नगरपालिकामा किशोरीहरुद्धारा बिभिन्न सचेतनामुलक कार्यक्रमहरु सञ्चालन गर्न थालेका छन् । सुरु सुरुमा अगाडी गएर बोल्न पनि समस्या हुने देवचुली १६ की सपना पौडेल, आजकल विद्यालयमा र समुदायस्तरमा हुने बिभिन्न कार्यक्रमहरुमा सहभागीता जनाउने र आफ्नो समस्याहरु समेत स्पष्टताका साथ राख्न सक्ने भएकी छिन । पहिलो महिनावारी हुँदाको आफ्नो जिज्ञासा र समस्याहरु भोगेकोले पनि वर्तमान समयमा किशोरीहरुको समस्या र भन्न नसक्ने अवस्थालाई हामीले स्वयम किशोरीहरुलाई नै यो प्राकृतिक कुरा भएको र यो बेलामा सरसफाई र आफ्नो अभिभावकहरुलाई भन्ने र बिशेष ध्यान दिनुपर्दछ भन्ने बारेमा अभियानहरु सञ्चालन सुरु गरेको कुरा उनले बताईन ।

सवै किशोरीहरुमा प्रतिभा हुने नै गर्दछ । मात्र त्यसको लागि सही समय र बाताबरणको सृजना समाजले र परिवारले गरिदिनुपर्दछ । सही समयमा किशोरीहरुमा गरिएको लगानीको अर्थ उनीहरुले सवै क्षेत्रमा देखाउन सक्दछन् भन्ने कुराको प्रमाणीत रुप हो, प्रिया पुन मगर, देवचुली १६ । किशोरी शसक्तिकरण कार्यक्रमको अभियन्ता भएपछी मैले मेरो म भित्र भएको प्रतिभालाई चिन्ने मौका पाए र कार्यक्रमहरुमा सहभागी भएपश्चात मिस टिन नवलपुरको अवार्ड समेत जित्न सफल भए । उनी अगाडी थप्छीन, हामीले किशोरीहरुलाई मात्र समस्याको रुपमा हेर्यौ, त्यही भएर सधै उनीहरु पछाडी नै परे तर अव भने परिवर्तन आवश्यक छ । किशोरीहरुमा समस्या मात्र होईन, उनीहरुको प्रतिभा पनि हेर्नुपर्दछ र हामीले अवसरहरु पनि दिनुपर्दछ । अवार्ड जिते पश्चात पनि बिभिन्न सचेतनामुलक कार्यक्रमहरु सहभागी भएर किशोरीहरुलाई उत्पेरीत गर्ने कार्यक्रममा सहभागिता जनाउने गरेको उहाँले बताउनुभयो ।

समाजमा बढ्दो हिंसा न्युनिकरणको लागि समाजको नीति तथा नियमहरु सँगै स्वयम किशोरीहरुलाई समेत यसको बारेमा जानकारी दिनुपर्दछ । किशोरीहरुलाई आत्मसुरक्षाको लागि मानसिक रुपमा, शारिरीक रुपमा र काननुको बारेमा समेत जानकारी दिदै किशोरीमैत्री समाजको निर्माणमा अभियान आवश्यक परेको कुरा अर्की किशोरी रेजिना घर्ती मगर, देवचुली १७ की ले बताउनुहुन्छ । सुरु सुरुमा हिंसाको बारेमा समेत जानकारी नपाएका हामीले यो कार्यक्रममा सहभागिता जनाएपछी सैद्धान्तीक मात्र होईन प्राक्टीकल कक्षाहरु पनि लियौ र सोही अनुसार अहिले आफ्नो विद्यालय, समुदाय र अन्य छिमेकी नगरपालिकाहरुमा समेत आत्मसुरक्षाको तालिमहरु सहजिकरण गर्न जान लागेको कुराहरु बताउनुभयो । जागृति बाल तथा युवा सरोकार नेपालको समन्वयमा देवचुलीमा किशोरी शसक्तिकरण कार्यक्रम १ वर्ष अगाडी बाट सुरु भएको र यो कार्यक्रमबाट किशोरी अभियन्ताहरुको निर्माण गरी समाजलाई हिंसामुक्त र किशोरीमैत्री समाजको निर्माणमा ३० जना किशोरीहरुको सहभागिता रहेको कुरा कार्यक्रम संयोजक दिपक शर्माले बताउनुभयो । परिवर्तनको लागि र लगानीको लागि समेत किशोरीहरुमा बर्तमानमा गरिएको लगानी सही रहेकोले सवैलाई सोही अनुसार नै कार्यहरु गरेमा समाजको परिवर्तन र समाज हिंसामुक्त हुने थियो की ।