स्वामित्व विवादः गण्डकी प्रदेशमा ल्याउन स्थानीयको माग

ज्ञानु पंगेनी,

कावासोती ।  मुस्लिम र हिन्दु समुदायको आस्थाको केन्द्र मानिने नवलपरासीको मदारबाबा थानको स्वामित्व गण्डकी प्रदेशमा ल्याउनुपर्ने माग स्थानीयले गरेका छन् ।

पौराणिक धार्मिक तथा ऐतिहासिक स्थल मदारबाबा थान गण्डकी प्रदेशको विनयी त्रिवेणी गाउपालिका वडा नम्बर ६ मा पर्छ । मदारबाबा थान यसअघि एउटै जिल्ला हुँदा प्रदेश नम्बर ५ अन्तरगतको साविकको कुडिया गाविसमा पर्दथ्यो । अहिले गण्डकी प्रदेश अन्तरगत परेपनि त्यसको स्वामित्व अहिलेसम्म प्रदेश ५ मा नै रहेको हुँदा अब गण्डकी प्रदेश अन्तरगत ल्याउन स्थानीयको माग छ ।

मदारबाबा थानमा प्रत्येक वर्ष फागुन महिनामा धार्मिक मेला लाग्ने गर्दछ । यसवर्ष पनि आउँदो फगुन १२ गतेबाट मेला सुरु हुदै छ । तर मेलाको व्यवस्थापन गण्डकी प्रदेश अन्तरगत रहेको व्यवस्थापन समितिले गर्न पाउनुपर्ने माग गर्दै सोमबार स्थानीयले विनयी त्रिवेणी गाउँपालिकामा ध्यानाकर्षण गराएका छन् ।

यसअघि ५ नम्बर प्रदेश अन्तरगत रहेको समितिले मेलाको व्यवस्थापन गर्दै आएकोमा अब जुन प्रदेशमा धार्मिक स्थल छ सोही प्रदेश अन्तरगत रहेको व्यवस्थापन समितिले मेलाको व्यवस्थापन गर्न पाउनुपर्ने माग गरिएको छ । मदारबाबा थानको संरक्षण र विकासका लागि दुई वटा व्यवस्थापन समिति निर्माण गरिएको छ ।

जिल्ला एउटै हुँदा निर्माण गरिएको समितिले नै मेलाको व्यवस्थापन गर्दै आएको थियो तर नवलपरासी दुई वटा जिल्लामा विभाजन भएपछि गण्डकी प्रदेशमा बसोवास गर्दै अँएका स्थानीयले ६ महिना अघि जमालुद्धिन अन्सारीको अध्यक्षातामा १३ सदस्यीय समिति गठन गरेको थियो । सोहि व्यवस्थापन समितिले मेलाको व्यवस्थापन गर्न पाउनुपर्ने माग गर्दै आएपनि गाउँपालिका र जिल्ला प्रशाशन कार्यालयले वेवास्ता गर्दै आएको स्थानीयको आरोप छ ।

जिल्ला प्रशाशन कार्यालय नवलपुरमा वैद्यानिक रुपमा नै समिति दर्ता गर्न छ महिनादेखि धाएपनि प्रशाशनले विभिन्न बाहानामा आलटाल गर्दै आएको अध्यक्ष जमालुद्धिन अन्सारीको भनाई छ ।

मेला लाग्ने समय नजिकै आईसकेकाले मेलाको तयारीका लागि समेत समय अभाव हुने भएकाले यस विषयलाई छिट्टै टुङ्गो लगाउन मियाले आग्रह गरे । यदि मेला व्यवस्थापनको जिम्मा आफुहरुले नपाएमा अरुलाई पनि काम गर्न नदिने उनले चेतावनी समेत दिएका छन् ।
मदारबाबाको मुख्य स्थल अहिले सुस्ता गाउँपालिकाको महलबारी बजारबाट करिब नौ किमी पहाडी क्षेत्र विनयी त्रिवेणी गाउँपालिका ६ को दुम्कीबास डाँडामा पर्छ । यहाँ प्रत्येक वर्ष करीब १० लाख भक्तजनहरु मेलामा आउने गर्छन् । मुस्लिम र हिन्दु धर्म मान्ने भारत र नेपालका भक्तजनहरु मेला भर्न आउने गर्छन् ।

मदारबाबा पुगेर पूजा आराधना गरेमा मनले चाहेको कुरा पुरा हुने जनविश्वास रहिआएको छ । मदारबाबाको मेलामा आउने भक्तजनको मनोकामना पूरा हुने, विभिन्न दुःखबाट पीडाबाट मुक्ती पाईने आस्था र विश्वास रहेको छ ।
यहाँ प्रत्येक वर्ष १० दिनसम्म लाग्ने मेलाबाट करौडौं रुपैयाँ दान रकम संकलन हुने गर्दछ । उक्त रकम व्यवस्थापन समिति र जिल्ला प्रशाशन कार्यालय नवलपरासी पश्चिमले संकलन गर्दै आएको छ ।

विनयी त्रिवेणी गाउँपालिकाका अध्यक्ष डम्बर बहादुर जिशीले मदारबाब थान जिल्ला विभाजनपछि विनयी त्रिवेणीमा पर्ने भएकाले त्यसको स्वामित्व आफुहरुले ल्याउनका लागि पहल गरिरहेको बताए । गतवर्ष ५ नम्बर प्रदेश अन्तरगतको समितिले मेला संचालन गरे पनि यसवर्ष आफुहरुले नै मेला संचालन गर्ने उनको भनाई छ । यहि विहीबार दुवै प्रदेशका समितिसंग छलफल गर्ने कार्यक्रम रहेको र यदि त्यस छलफलबाट निश्कर्ष ननिस्किए जिल्ला प्रशाशन र गाउँपालिकाले समन्वय गरेर व्यवस्थापन समिति गठन गरी मेला संचालन गरिने अध्यक्ष जिशीले बताए ।

नवलपुरका प्रमुख जिल्ला अधिकारी दिपकराज नेपालले मदारबाबा थान नवलपुर अन्तरगत पर्ने भएकाले त्यसको स्वामित्व अब आफुहरुकोमा नै आउने बताउँछन् । पहिलेदेखि नै परासीमा दर्ता गरेको समिति भएकाले एउटै संस्थामा दुई वटा समितीलाई मान्यता दिन नसकिएको नेपालले बताए ।