जिल्ला खेलकुद बिकास समिति नवलपुरको कार्यालयमा तालाबन्दि

ज्ञानु पंगेनी
कावासोती । जिल्ला खेलकुद विकास समिति नवलपुरको कार्यालयमा मंगलवार अनिश्चित कालीन तालाबन्दि गरिएको छ । राष्ट्रिय तेक्वान्दो संघ नेपाल जिल्ला कार्य समिति नवलपुरले अन्याय पूर्ण ढंगले खेलाडी छनौट गरेको भन्दै तीन दिने संघर्षका कार्यक्रम समेत सार्वजनिक गरेको छ । मंगलवार कार्यालयमा अनिश्चितकालीन तालाबन्दी बुधवार फागुन १५ गते जिल्ला प्रशाशन कार्यालयमा ज्ञापनपत्र बुझाउने र फागुन १६ गते जिल्ला अदालतमा मुद्धा दर्ता गर्ने कार्यक्रम सार्वजनिक गरेको छ ।
जिल्ला खेलकुद विकास समिति नवलपुरले जिल्ला स्तरबाट तेक्वान्दोको खेलाडी छनौट नै नगरि प्रदेश छनौट प्रतियोगितामा पैसाको चलखेलमा खेलाडी छनौट गरी पठाएको राष्ट्रिय तेक्वान्दो संघ नेपाल नवलपुरको आरोप रहेको छ । जिल्ला खेलकुद विकास समितिले खेलाडीको छनौट अधिकारलाई कुष्ठित पार्ने काम गरेको तेक्वान्दो संघ नवलपुरका अध्यक्ष कुशुम सुवेदीले बताए । जिल्लाबाट खेलाडी छनौट गरेर मात्रै प्रदेश छनौटमा खेलाडी पठाउन माग गर्दै संघर्षका कार्यक्रम शुरु गरिएको अधयक्ष सुदेवीले बताएका छन् । आफुहरुको माग पुरा नभएसम्म तालाबन्दी नखोल्ने चेतावनी समेत अध्यक्ष सुवेदीले दिए ।