गैडाकोटमा फेरी २ वटा शंकास्पद बस्तु भेटियो, बम भएको आशंकामा सेनाको टोली घटनास्थलमा

कावासोती । विप्लव नेतृत्वको नेकपाले गरेको नेपाल बन्दको दिन आज नवलपुरका विभिन्न स्थानमा शंकास्पद बस्तु भेटिनुका साथै शक्तिशाली बम समेत बिस्फोट भएको छ । गैडाकोट नगरपालिकाको जयश्री पुलमाथि नै आज बिहान फेला परेको शंकास्पपद बस्तु बम नभएको पुष्टि भएको केहि घण्टामै सोहि स्थान नजिकै फेरी २ वटा बम जस्तै देखिने पोका भेटिएको छ ।
बिहान भेटिएको शंकास्पपद बस्तु बम भएको आशंकामा नेपाली सेनाको बम डिस्पोज टोलीले डिस्पोज गर्ने क्रममा बम नभएको पुष्टि गरेको थियो । सोहि ठाउ नजिकै अर्थात गैडाकोट नगरपालिका ९ को जय श्री पुल नजिकै रहेको प्लटिङ गरिएको स्थानमा फेरी अर्को २ वटा शंकास्पद बस्तु भेटिएको र त्यो शंकास्पद बस्तु सुतली र पेट्रोल बम हुनसक्ने आशंका प्रहरीले गरेको छ ।
अहिले नेपाली सेनाको बम डिस्पोजल टोली शंकास्पद बस्तु भएको ठाउमा पुगेको र डिस्पोजको तयारी भईरहेको ईलाका प्रहरी कार्यालय गैंडाकोटले जनाएको छ । यसैगरि जिल्ला सदरमुकाम कावासोतिमा शक्तिशाली बम बिस्फोट भएको छ । पुर्ब पश्चिम राजमार्ग अन्तरगत डिभिजन बन कार्यालय कावासोतिको ठिक अगाडि साढे ११ बजेतिर शक्तिशाली बम बिस्फोट भएको हो । बिस्फोट निकै ठूलो आवाजमा भएको थियो । यधपी कुन बम बिस्फोट भएको हो भन्ने विषयमा अनुसन्धान भैरहेको जिल्ला प्रहरी कार्यालय नवलपुरले जनाएको छ । तर बिस्फोटपछि बारुदको गन्ध आएकाले सकेट बम हुन सक्ने अनुमान गरिएको प्रहरी नायब उपरीक्षक लिलाराज लामिछानेले बताए । बिस्फोट पछि सुरक्षा सतर्कता थप बलियो बनाईएको छ । बिस्फोटबाट मानबिय तथा भौतिक क्षति भने भएको छैन् । बिस्फोट भएको स्थानदेखी जिल्ला प्रहरी कार्यलय नवलपुर करिब १०० मिटरको दुरिमा पर्छ ।