नवलपरासीमा मदरसाका विद्यार्थीहरु माध्यमिक शिक्षाबाट बञ्चित बन्दै

नवलपरासी ।नवलपरासीको मदरसामा अध्यनरत विद्यार्थीहरु उच्च शिक्षाबाट बञ्चित हुँदै गईरहेका छन् । जिल्लामा अधिकांश मदरसाहरु संचालनमा छन् । ती सबै मदरसाहरुमा आधारभुत तह कक्षा १ देखी कक्षा ५ सम्म मात्र पठन–पाठन हुन्छ । जसका कारण मदरसाका विद्यार्थीहरुले माध्यमिक शिक्षा सम्म प्राप्त गर्न सकेका छैनन्।

परम्परागत शिक्षा सम्बन्धि ब्यवस्था अनुसार पाठ्यक्रम विकाश केन्द्रले कक्षा १ देखी ५ सम्मको लागी मदरसा शिक्षाको लागि पाठ्यक्रम बनाएको छ । तर कक्षा ६ देखी १२ सम्मको पाठ्यक्रमको प्रस्तावित संरचना तयार हुँदा पनि संचालनमा आउन सकेको छैन् । आधारभुत शिक्षा प्राप्त गरेपछि थप शिक्षाको लागि विद्यार्थीहरु भारत जान बाध्य छन् । जसका कारण आर्थिक अवस्था बलियो भएकाहरु विदेशमा भएपनि अध्ययन गर्न पाएका छन् भने कमजोर आर्थिक अवस्थाका विद्यार्थीहरु पढाई छोड्न बाध्य भएको मदरसा मदिनतूल ओलुम गुठी परसौनीका प्रधानाध्यापक अमिर आजमले बताए ।

धार्मिक प्रकृतिका सामुदायिक विद्यालयमा माध्यमिक तह सम्मको कक्षा संचालन गर्नका लागि विद्यालयमा १५ जना विद्यार्थी अनिवार्य गरिएको छ । आउने शैक्षिक सत्रसम्ममा विद्यार्थी संख्या पुग्ने भएकाले मदरसा मदिनतूल ओलुम गुठी परसौनी विद्यालयमा मावि तहसम्मको कक्षा संचालन गाउँपालिकामा अनुमति प्रतिवेदन बुझाएको आजमले बताए ।

शैक्षिक वर्ष २०७३ सालमा जिल्लामा कुल संचालित ४४ मदरसाहरुमा करिब २ हजार ५ सय ६३ विद्यार्थीहरु अध्यन गर्दै आएका छन् ।