नवलपरासीमा भूकम्प प्रभावितको गुनासो सम्बोधन गर्न प्राविधिक खटिए

ज्ञानु पंगेनी

नवलपुर । नवलपरासीमा भूकम्प प्रभावितहरुको समस्या समाधानका लागि प्राविधिकहरु खटिएका छन् । बसाबासको लागि एकाघरको कुनै सदस्यको नाममा कहिकतै पनि अर्को घर नभएका गुनासो कर्ताहरुले स्थानीय तहमा दर्ता गरेको भूकम्प प्रभावितहरुको गुनासो सम्बोधन गर्न शुक्रवारबाट प्राविधिकहरु खटिएका हुन् ।अन्तिम पटक लगत संकलन गरी यथार्थ र वास्तविक पीडितहरुलाई बसोबासका लागि राज्यको तर्फबाट दिईने अनुदान रकम वितरण गर्न नवलपरासी दुवै जिल्लाको भूकम्प प्रभावित स्थानीय तहमा १२ जना र ३ जना जिल्लामा बैकल्पिक श्रोतको रुपमा खटिएका छन् । गैंडाकोट नगरपालिकामा एक जना, देवचुली नगरपालिकामा दुई जना, कावासोती नगरपालिका, बौदीकाली गाउँपालिका, विनयी त्रिवेणी गाउँपालिका, प्रतापपुर गाउँपालिका र सरावल गाउँपालिकाका लागि दुई जना खटाईएको छ ।

यी स्थानीय तहमा कम गुनासो परेकाले र सुगम ठाउँमा पर्ने भएकाले दुई जना मात्रै खटाईएको हो । यस्तै मध्यविन्दु नगरपालिकामा दुई जना, हुप्सेकोट गाउँपालिकामा दुई जना र बुलिङ्गटार गाउँपालिकामा तीन जना प्राविधिक खटाईएको राष्ट्रिय पुनर्निर्माण प्राधिकरण जिल्ला आयोजना कार्यान्वयन इकाई, नवलपरासी पूर्वका प्रमुख राजेन्द्र कार्कीले बताए ।

नवलपरासीमा कूल १४ सय ५० वटा गुनासो दर्ता भएको छ । गैंडाकोट नगरपालिकामा ५०, देवचुली नगरपालिकामा २ सय ६०, कावासोती नगरपालिका, बौदीकाली गाउँपालिका, विनयी त्रिवेणी गाउँपालिका, प्रतापपुर गाउँपालिका र सरावल गाउँपालिकामा १ सय ६०, मध्यविन्दु नगरपालिकामा २ सय ५०, हुप्सेकोट गाउँपालिकामा १ सय ३९ र बुलिङ्गटार गाउँपालिकामा ४ सय ५० वटा गुनासो दर्ता भएको प्रमुख कार्कीले जानकारी दिए । नवलपरासीमा ३० दिनभित्र लगत संकलन गर्ने समयसिमा रहेको भएपनि कम्तीमा १५ दिनमा संकलन कार्य सम्पन्न हुने प्रमुख कार्कीले बताए । यहा गुनासो पनि कम दर्ता भएको र अन्य भुकम्प प्रभावित जिल्लाहरुभन्दा भौगोलिक रुपमा पनि केहि सुगम रहेकाले काम छिटो सम्पन्न हुने उनको भनाई छ । एक जना प्राविधकले कम्तीमा एक सय ५० जना गुनासोकर्तासंग लगत संकलन गर्ने लक्ष्य राखिएको कार्कीले बताए ।