सामाजिक र नैतिक शिक्षा नेपालीमा पढाउने देवचुली नगरपालिकाको निर्णय, प्याब्सनको विरोध

बिजय चालिसे
कावासोती । नवलपुरको देवचुली नगरपालिकामा आगामि शैक्षिक सत्रबाट सामाजिक र नैतिक शिक्षा नेपाली भाषामा अध्ययन अध्यापन गराउने निर्णय सार्वजनिक गर्नु पुर्व नै विरोध भएको छ । नगरपालिकाले मंगलबार पत्रकार सम्मेलन नै गरेर देवचुली नगरभित्रका सबै सामुदायिक तथा संस्थागत विद्यालयहरुमा सामाजिक र नैतिक शिक्षा अनिवार्य गरि नेपाली भाषामा अध्यापन गराउने निर्णय सार्वजनिक गर्न पत्रकार सम्मेलनको आयोजना गरिएको थियो ।
तर पत्रकार सम्मेलन भन्दा अघि नै नगरका सरोकारवालाहरुको छलफल कार्यक्रम सकिए लगत्तै प्याब्सनले विरोध गरेको हो । प्याब्सन देवचुली नगर संयोजक ढाकाराम भट्टराईले नगरपालिकाको निर्णय आफुरुलाई मान्य नभएको बताउनुभयो । उहाले नगरपालिकाले नगरभित्रका शैक्षिक सरोकारवालाहरुलाई वेवास्ता गर्दै एकलौटी निर्णय गरेको आरोप लगाउनुभयो । उहाले भन्नुभयो– यो निर्णय हामिलाई मान्य छैन, नगरपालिकाले सरोकारवालाहरुसंग छलफल नै नगरि एकलौटी निर्णय लिनु गलत भएको छ । उहाले एकै पटक सबै कक्षामा सामाजिक र नैतिक विषय नेपाली भाषामा पढाउन समस्या हुने भएकाले बरु प्रत्येक वर्षमा एक÷एक कक्षामा लागु गर्दै लैजानुपर्ने सुझाव दिनुभयो ।
यता नगरपालिकाले भने निर्णय शिक्षा क्षेत्रको सुधारमा कोसेढुङा सावित हुने दावी गरेको छ । पत्रकार सम्मेलनमा नगरपालिकाका प्रमुख प्रशासकिय अधिकृत बिष्णु प्रसाद भुषालले नगरपालिकको निर्णय सहि भएको भन्दै यसले विद्यार्थीहरुलाई नैतिकवान बनाउन थप मद्वत पुग्ने बताउनुभयो । उहाले पछिल्लो समय समाजमा नैतिक चरित्र भएका व्याक्तिहरु कम भएको दावी गर्दै भविष्यका कर्णधारहरुलाई नैतिकवान बनाउन यस्तो निर्णय लिईएको बताउनुभयो । उहाले प्याब्सन पनि सहमतिमा आउने भन्दै उनिहरुको विरोध क्षणिक मात्र भएको दावी गर्नुभयो ।
नगर प्रमुख पुर्ण कुमार श्रेष्ठले भने निर्णय गर्नुअघि छलफल गर्न नसक्नु गल्ति भएको स्विकार गर्नुभयो । उहाले सरोकारवालाहरुसंग पनि छलफल गरेर निर्णय लिनुपर्ने हो तर समय अभावका कारण सम्भव नभएको बताउनुभयो । उहाले निजि विद्यालयहरुको मागलाई सम्बोधन गर्ने गरि छलफल हुने बताउनुभयो । नगरपालिकको सोमबार बसेको बैठकले सामाजिक र नैतिक शिक्षा नेपाली भाषामा पढाउने सहित अन्य विभिन्न निर्णय गरेको थियो । कार्यपालिका बैठकले वडा कार्यालय निर्माण तथा ब्यवस्थापन, सार्वजनिक, सरकारी, प्रति जग्गाको लगत संकलन, दनगरका सबै विद्यालयमा बाल उद्यान निर्माण लगायतका निर्णय गरेको थियो ।