नवलपुरमा पांच सय जना अट्ने कृषक सभाहल निर्माण हुदै

ज्ञानु पंगेनी/ नमुना सन्देश
कावासोती । किसान लक्षित कार्यक्रमका लागि नवलपुरमा पांच सय जना अट्ने क्षमताको कृषक सभाहल निर्माण गरिएको छ । कावासोती दुईमा रहेको कृषि उपज थोक बजार व्यवस्थापन समितिको पहलमा नेपाल सरकार कृषि विकास मन्त्रालयको ४५ लाख रुपैयाको बजेटमा सभाहल निर्माण गरिएको हो ।
कृषि उपज थोक बजार व्यवस्थापन समितिले संचालन गरेको सटर भवनको माथिल्लो तलमा सभाहल निर्माणको काम अहिले चलिरहेको छ । सभाहल निर्माण आउदो असारको पहिलो हप्ताभित्र सम्पन्न हुने कृषि उपज थोक बजार व्यवस्थापन समितिका अध्यक्ष लेखनाथ बस्यालले जानकारी दिए । सभाहल निर्माण सम्पन्न गर्न कम्तीमा ६० लाख रुपैया लगानी लाग्ने अनुमान गरिएको छ । बाकी अपुग रकम संस्थाले आफैले थपेर सभाहल निर्माण पुरा गरिने अध्यक्ष बस्यालले बताए । नवलपुर जिल्ला कृषि क्षेत्रको उर्वर क्षेत्र भएकाले यहा व्यवसायिक किसान धेरै छन । कावासोती जिल्ला सदरकमुकाम भएकाले यहा कृषकका लागि तालिम र तथा विभिन्न पशिक्षणहरु भईरहन्छन । त्यस्ता कार्यक्रम हुदा होटलमा महङ्गो रकम तिरेर गर्न नपरोस भन्ने उदेश्यले सभाहल निर्माण गरिएको अध्यक्ष बस्यालको भनाई छ । किसानहरुका लागि एकदमै सहुलियत शूल्कमा सभाहल उपलब्ध गराईने बस्यालले बताए ।
यसैबिच यहाका किसानले नवलपुरमा कृषि ज्ञान केन्द्रको माग गरेका छन । देशमा संघीयता आएपछि जिल्ला कृषि विकास कार्यालय विगठन भएको छ भने स्थानीय तहमा कृृषि शाखाको व्यवस्था गरिएको छ । कृषि शाखामा स्थानीय तहले कृषि प्राविधिक राख्नुपर्ने प्रावधान भए पनि यहाका स्थानीय तहले त्यसको व्यवस्था गर्न नसक्दा किसान मारमा परेका छन । किसानका लागि आवश्यक पर्ने प्राविधिक ज्ञान लिन समस्या भएको यहाका किसानको गुनासो छ । नवलपुर जिल्ला गण्डकी प्रदेशको सबैभन्दा पुछारको जिल्ला पर्ने भएकाले भौगोलिक रुपमा यहाका किसानले आफुलाई आवश्यक पर्दा तनहुमा पुगेर काम गर्न निक्कै समस्या भएको एक जना किसान नारायण आचार्यले बताए । प्रदेश सरकार मातहत रहने गरी कृषि ज्ञान केन्द्र रहने प्रावधान छ । गण्डकी प्रदेश सरकार अन्तरगत ११ वटा जिल्ला रहे पनि गोरखा जिल्ला बाहेक अन्य जिल्लामा एउटा कार्यालयले दुई वटा जिल्ला हेर्ने गरी कृषि ज्ञान केन्द्र राखिएको छ । नवलपुर जिल्ला र तनहुं हेर्ने गरी दमौलीमा एउटा ज्ञान केन्द्र खोलिएको छ । तर दमौली पुगेर सेवा लिन नवलपुरका किसानलाई भौगोलिक विकटता , आर्थिक भार संगै समय पनि बढि लाग्ने हुदा नवलपुरमै ज्ञान केन्द्रको कार्यालय स्थापना हुुनुपर्ने कृषक र कृषि संग सम्बन्धित विभिन्न संघसंस्थाले माग गरेका छन ।