हुप्सेकोट गाउँपालिकाका सामुदायिक वनमा एकिकृत जलाधार व्यवस्थापन 

कावासोती। पूर्वी नवलपरासीको हुप्सेकोट गाउँपालिकाका सामुदायिक वनमा एकिकृत जलाधार व्यवस्थापन सम्बन्धी अभ्यास कार्यक्रम आजबाट शुरु भएको छ ।

हुप्सेकोट गाउँपालिकाको मुसेडाँडा सामुदायिक वनको सभाहलमा आजदेखि तालिम शुरु भएको हो । कार्यक्रममा नमुना सामुदायिक कार्यक्रम शुरु भएको मुसेडाँडा सामुदायिक वन र छिमेकी सामुदायिक वनको सहभागितामा रहेको छ ।

कार्यक्रममा सामुदायिक वन क्षेत्रको जलाधार क्षेत्रको व्यवस्थापन सम्बन्धी अभ्यास सहितको तालिम प्रदान हुने आयोजक सामुदायिक वन उपभोक्ता महासंघ नवलपुरका अध्यक्ष ठाकुर पाण्डेले बताउनु भयो । दुई दिन सञ्चालन हुने कार्यक्रममा सहभागि सामुदायिक वन क्षेत्रका जलाधारको एकिकृत व्यवस्थापन कसरी गर्न सकिन्छ भन्ने बिषयमा छलफल हुने आयोजक संस्थाले जनाएको छ ।

हरियो वन कार्यक्रमको आर्थिक सहयोग तथा सामुदायिक वन उपभोक्ता महासंघको आयोजनामा सञ्चालित कार्यक्रममा केयर नेपालका नविन ढुङ्गनाले सहजिकरण गर्नुहुनेछ । उहाँले पहिलो दिन जलाधार क्षेत्रको बारेमा जानकारी गराउनु भएको थियो ।

कार्यक्रममा हरियो वन कार्यक्रम सामुदायिक वन उपभोक्ता महासंघ तर्फका अधिकृत रमेश तिमिल्सेना, हरिस धामीले नमुना सामुदायिक वनको बारेमा सहजिकरण गर्नु हुने जिल्ला महासंघका स्थानीय श्रोत व्यक्ती खेम नारायण महतोले जानकारी दिनु भयो ।

कार्याक्रमको उद्घाटन सत्रमा सव डिभिजन वन कार्यालय हुप्सेकोट बौदीकालीका प्रमुख चमेली देवकोटा, हुप्सेकोट गाउँपालिका स्थानीय महासंघका अध्यक्ष गुरु प्रसाद खनालले मन्तव्य व्यक्त गर्नु भएको थियो । कार्यक्रमको सहजिकरण जिल्ला महासंघका सचिव सिता भुसालले गर्नु भएको थियो ।

हरियो वन कार्यक्रम अन्र्तगत सामुदायिक वन उपभोक्ता महासंघ नेपालले देशका बिभिन्न ९ जिल्लाका ९ वटा सामुदायिक वनमा नमुना सामुदायिक वन कार्यक्रम सञ्चालन गर्दै आएको छ । पूर्वी नवलपरासीको हुप्सेकोट –४ मा रहेको मुसेडाँडा सामुदायिक वनमा यो कार्यक्रम लागु भएपछि सामुदायिक वनको आन्तरिक सहित अन्य व्यवस्थापनको लागि महासंघले कार्यक्रम सञ्चालन गर्दै आएको छ ।