किशोरी शसक्तिकरणका लागि किशोरीहरुलाई प्रशिक्षण

दिपक शर्मा
कावासोती । पछिल्लो समय किशोरीहरुमाथि भएको हिंसा, दृव्र्यवहार, भेदभाव तथा असमानताको अन्त्यको लागि नवलपुरको देवचुलीमा सञ्चालन रहेको किशोरी शसक्तिकरण कार्यक्रममा आबद्ध किशोरीहरुलाई प्रशिक्षक प्रशिक्षण तालिम मगंलबार आजबाट चितवनको सौराहामा सुरु भएको छ । जागृति बाल तथा युवा सरोकार नेपालको आयोजना तथा कन्नालनको सहयोगमा विगत १ वर्षदेखी नवलपुरको देवचुली नगरपालिकामा यो कार्यक्रम सुरु भएको र पहिलो वर्षको निरन्तरताको साथै दोस्रो वर्षका नयाँ किशोरी अभियन्ताहरुको लागि यो तालिम सञ्चालन गरिएको आयोजक संस्थाका अध्यक्ष तिलोत्तम पौडेलले बताए ।

देवचुली नगरपालिकाका सवै वडाहरु र सामुदायिक तर्फका माध्यमिक तहमा अध्ययनरत किशोरीहरुलाई बिभिन्न क्षमता विकासको तालिमहरु सञ्चालन गरि हिंसा, दृव्र्यवहार, जोखीमबाट बच्नको लागि आत्मरक्षा तालिमको साथमा नेतृत्व विकास सम्बन्धी तालिमहरु प्रदान गरी उनीहरुद्धारा नै विद्यालयस्तर र समुदायस्तरसम्म बिभिन्न अभियानहरु र कार्यक्रमहरु सञ्चालन गर्ने गरी योजना निर्माण गरिएको परियोजना संयोजक श्रद्धा बर्माले बताईन् ।
दोस्रो वर्षको लागि नयाँ १७ जना किशोरीहरु र पहिलो वर्षका १३ जना किशोरीहरुलाई उक्त तालिमहरु प्रदान गरी देवचुली नगरपालिका १७ वडाहरु र सवै विद्यालयका किशोरकिशोरीहरु, जनप्रतिनिधीहरु र अन्य सरोकारवालाहरुलाई उक्त विषयवस्तुहरुको बारेमा साथी समुहको रुपमा कार्यक्रम सञ्चालन गर्ने गरी योजना बनाईएको कुरा आयोजक संस्थाले बताएको छ । किशोरीमाथी हुन सक्ने हिंसा, दृव्र्यवहार अन्त्यको लागि यस्ता खालका कार्यक्रमहरुले सहयोग गर्ने महिला अधिकारकर्मी एवम उक्त परियोजना सल्लाहकार समितिका पदाधिकारी सरिता शर्माले बताईन् । उक्त कार्यक्रममा १७ जना किशोरी अभियन्ताहरुको साथमा विद्यालयका फोकल शिक्षकहरु र पहिलो वर्षका केही किशोरी अभियन्ताहरु गरी ३० जनाको सहभागिता रहेको र तालिम ५ दिनसम्म सञ्चालन हुनेछ ।