पर्वतका पर्यटकीय स्थलको भ्रमण

पर्वत । स्पेनका संस्कृति, पर्यटन तथा खेलमन्त्री नुरिया फ्लोरेश रेडोण्डोको नेतृत्वमा लुम्बिनी फाउण्डेशनका पदाधिकारीसहितको टोलीले पर्वतका विभिन्न पर्यटकीय स्थलको भ्रमण गरेको छ । सरकारले सन् २०२० लाई नेपाल भ्रमण वर्षको रूपमा मनाइरहेका बेला राष्ट्रियसभाका अध्यक्ष गणेशप्रसाद तिमिल्सिनासहित स्पेनी मन्त्री नुरियाको टोलीले जिल्लाको सबैभन्दा उचाइमा रहेको कालाञ्जर क्षेत्र र एशियाकै ठूलो महाशिलाको अवलोकन गरेको हो । उहाँहरुले यी क्षेत्रको प्रवद्र्धनमा सहयोग पुर्याउने प्रतिबद्धता व्यक्त गर्नुभएको छ । शुक्रबार कालाञ्जर क्षेत्रमा आएको टोलीले केही समय त्यहाँको अवलोकन गरी पुनः महाशिला पुगेको हो । पर्वतको मोदी गाउँपालिका–१, डाँडाकमेरेमा हेलिकोप्टरमार्फत आएको टोलीले उक्त क्षेत्रको सुन्दरता अवलोकन गरेको छ । सो अवसरमा स्थानीय मगर, गुरुङ, ब्राम्हण, दर्जी समुदायले आ–आफ्नो संस्कृति झल्कने गरी प्रस्तुतिहरु राखेका थिए ।

स्पेनका जनप्रतिनिधि र व्यवसायीको टोलीले हिमालको सुन्दर दृश्यको आनन्दसमेत लिएका थिए । मोदी गाउँपालिकाले व्यवस्थापन गरेको उक्त अवलोकन भ्रमणका अवसरमा बोल्दै राष्ट्रियसभाका अध्यक्ष गणेशप्रसाद तिमिल्सिनाले सन् २०२० मा अपेक्षा गरेभन्दा पनि बढी बाह्य पर्यटक भित्र्याउनका लागि अन्तरराष्ट्रिय समुदायको ठूलो भूमिका रहेको बताउनुभयो । उहाँले यस्ता अवलोकन भ्रमणले पर्यटकीयस्थलको अन्तरराष्ट्रियस्तरमा समेत प्रचारप्रसार हुने बताउँदै संस्कृतिमन्त्री नुरियालाई त्यस देशका नागरिकलाई नेपाल घुम्नका लागि आह्वान गरिदिन आग्रह गर्नुभयो । यसैगरी उक्त टोलीले एशियाकै ठूलो मानिएको महाशीला ९ढुङ्गा० को पनि अवलोकन गरेको छ । पर्वतको महाशीला गाउँपालिका–५ लुङ्खुदेउरालीमा रहेको महाशीलामा पुगेको टोली ढुङ्गा देखेपछि दङ्ग परेका थिए ।

सोही अवसरमा महाशीला गाउँपालिकाको आन्तरिक भ्रमण वर्षको लोगोसमेत स्पेनी मन्त्री नुरियाले सार्वजनिक गर्नुभएको थियो । सो अवसरमा स्पेनी मन्त्रीसहितको टोलीलाई मोदी गाउँपालिकामै उत्पादन गरिएको अल्लोको कपडा र नेपालको झण्डा प्रदान गरिएको थियो ।