युवाकालागि सात दिने उद्यमशिलता तथा वित्तिय साक्षरता तालिम

ज्ञानु पंगेनी

नवलपुर । प्रतिनिधी सभा सदस्य तिलक महतले राज्यले लिएको ‘समृद्ध नेपाल सुखी नेपालीको ’ नारालाई साकार बनाउन कर्मठ युवाको भुमिका नै प्रमुख हुनेमा जोड दिएका छन् । नवलपुरको कावासोतीमा संचालन भएको सहुलीयतपूर्ण कर्जा सहजीकरणका लागि उद्यमशिलता तथा वित्तिय साक्षरता तालिमको समापन कार्यक्रममा बोल्दै महतले सो कुरामा जोड दिएका हुन् । विदेशमा गएर जस्तोसुकै काम गर्ने तर नेपालमा त्यहि काम स्वदेशमा गर्न लाज मान्ने कारणले पनि विदेशी भुमिमा धेरै नेपाली युवाहरुले ज्यान गुमाउनुपरेको , दुःख पाउनुपरेको भन्दै महतले स्वदेशमा नै युवालाई उद्यमी बनाउन राष्ट्रिय युवा परिषदले थालनी गरेको अभियानले सकारात्मक सन्देश दिएको बताए । कुनै पनि उद्यम संचालन गर्नभन्दा पहिले वा गरिरहदा त्यसका बारेमा राम्ररी बुझेर अगि बढेमा मात्रै सफल भईने कुरालाई मध्यनजर गर्दै सात दिनको तालिम आयोजना गरेर युवालाई शीप र दक्षता प्रदान गर्ने काम गर्ने युवा परिषद , रिटर्नी माइगे्रन्ट नेपाल , कावासोती नगरपालिका र एनएमबी ब्याङ्क प्रति महतले धन्यवाद दिए ।

युवा तथा खेलकुद मन्त्रालय राष्ट्रिय यूवा परिषदको आयोजनामा समृद्ध नेपालका लागि स्वस्थ्य, कर्मठ र उद्यमी यूवा भन्ने नारा सहित १५ गतेबाट सुरु भएको तालिम बुधबार सकिएको हो । तालिममा जिल्लाभरबाट ४० जना युवाहरुको सहभागीता रहेको थियो । सहभागीहरुले उद्यम वा कुनै पनि व्यवसाय गर्दा के कस्ता कुरामा ध्यान दिनुपर्दो रहेछ ? र, बित्तीय व्यवस्थापन सबैभन्दा महत्वपूर्ण कुरा रहेको जानकारी पाएको बताए । कुनै पनि व्यवसाय वा उद्यम संचालन गर्दा व्यवसाय परियोजना कसरी बनाउने भन्ने बारेमा समेत जान्ने अवसर पाएको बताएका थिए । महिला सहभागिले महिलाले व्यवसाय वा उद्यम संचालन गर्दा पाउने सहुलियका बारेमा समेत आजसम्म थाहा नभएको र तालिमबाट जान्न पाउदा खुसी लागेको बताएका थिए । तालिममा राष्ट्रिय यूवा परिषदका अर्जुन प्रसाद भट्टराई र देवेन्द्र न्यौपानेले प्रशिक्षण प्रदान गरेका थिए । । तालिममा कावासोती नगरपालीकाकी प्रमुख चन्द्र कुमारी पुन, , राष्ट्रिय, शिक्षा विकास तथा समन्वय ईकाइका प्रमुख कृष्णचन्द्र पोखरेल, एनएमबी बैङ्क कावासोती शाखाका शाखा प्रबन्धक प्रकाश थापा लगायतले बोलेका थिए ।

कार्यक्रम रिटर्नि माईग्रेन्ट नेपाल गण्डकी प्रदेशका अध्यक्ष नेत्र थनेतको अध्यक्षतामा भएको थियो । कार्यक्रममा बोल्दै अध्यक्ष थनेतले रिटर्नीले युवा र विषेश गरि वैदेशिक रोजगारीबाट फर्किएर आएका युवाहरुलाई लक्षित गरेर विभिन्न तालि र शीपमुलक तालिम संचालन गर्दै आएको र छिट्टै नै अन्य शीपमुलक तालिम संचालन गर्ने जानकारी दिए । युवाले नै देश बनाउन सक्ने हुँदा युवालाई स्वदेश मा नै केहि गर्नुपर्छ भन्ने भावना जगाउन पनि रिटर्नी लागि परेका ेथनेतले बताए ।