नवलपुरमा प्रहरीको गोली लागेका घाईते महतो अझै बेहोश

कावासोती । शनिबार राती नवलपुरमा प्रहरीले चलाएको गोली लागेर घाईते भएका मध्यविन्दु २ नन्दपुर निवासी ३४ बर्षका प्रेम महतोको आन्द्राको अपरेशन भएको छ । तथापी उनको होश भने अहिलेसम्म नआएको मध्यबिन्दु २ का वडाध्यक्ष नारायण पौडेलले बताएका छन् ।
रातीको समयमा नवलपुरको मध्यविन्दु २, कोल्हुवा चौराहामा मादकपदार्थ सेवन गरि प्रहरीमाथि आक्रमण गरेको भन्दै प्रहरीले गोली चलाउँदा महतो घाईते भएपछि उनलाई उपचारका लागी अस्पताल पठाईएको र उनीसँगै रहेका मध्यविन्दु ३ निवासी ३० बर्षीय मुन्ना महतो, र १९ बर्षीय सुरज महतोलाई पक्राउ गरेको र आज बिहान सबेरै जिल्ला प्रहरी कार्यालय नवलपुरले सम्पर्कमा आएका सञ्चारकर्मीलाई जानकारी गराएपनि आधिकारीक सुचना वा पत्रकार साक्षात्कार भने गरेको छैन । जिल्ला प्रहरी कार्यालय नवलपुरका प्रहरी उपरिक्षक दीपक रेग्मीले कोल्हुवा प्रहरी चौकीका सई गंगाराम कोईरीको नेतृत्वमा गस्तीमा रहेको टोलीमाथि ढुंगामुढा गरेपछि प्रहरीले आत्मरक्षाको लागि गोली प्रहार गरेकोे दावी गरे । तथापी, आजै पक्राउ परेका सुरज महतो र मुन्ना महतोलाई प्रहरीले छोडेको छ ।

गस्तीमा रहेको टोलीले एउटा मोटरसाईकलमा ३ जना चढेर आएको देखेपछि रोकेर चेकजाँच गर्न खोज्दा नरोकी भाग्न खोजेको र मोटरसाईकलले सइ कोईरीलाई लडाइर्, ढुंगाप्रहार गरेपछि आत्मरक्षाको लागि गोली चलाएको प्रहरी जनाएको थियो । वडाध्यक्ष पौडेलका अनुसार आजै वडा कार्यलयमा थारु कल्याणकारीणी सभा नवलपुरका गणेशमान महतो वडा नम्वर ३ का वडाध्यक्ष सहित केही स्थानीय सहितको बैठकले घटनाको सत्यतथ्य छानबिनका लागी वडाध्यक्ष पौडेलको संयोजकत्वमा १९ सदस्यीय छानबिन समिति गठन गरेको छ । उनले बिहान स्थानीय तथा राष्ट्रिय सञ्चार माध्यममा आएजस्तै ती स्थानीय ३ जना युवाले प्रहरीमाथी ढुंगामुढा प्रहार नै गरी प्रहरीलाई आत्मरक्षाका लागी गोली चलाउनुपर्ने अवस्था आएको भए र छानबिन तथा अनुसन्धानपछि दोषी भएमा प्रहरीमा उपस्थित गराउने शर्तमा गिरफ्तार भएका २ जनालाई तारेखमा रिहा गरेर ल्याएको बताए । त्यस्तै, वडाध्यक्ष पौडेलले घाईते महतोको कोखा र गोडामा २ राउण्ड गोली लागेकोमा कोखाको अप्रेशन गर्दा ३ सेन्टिमिटर आन्द्रा काटीएको तर होश भने अझै आईनसकेको बताए । त्यस्तै जिल्ला प्रहरी कार्यालय नवलपुरका प्रमुख तथा एसपी दीपक रेग्मीले घाईतेको उपचारमा राज्यले सघाउने र अन्य बिषयमा जिल्ला प्रशासनसँग कोअर्डिनेशन हुने बताए । प्रहरीले उनीहरूको साथबाट एक थान खुकुरी र उनीहरूले प्रयोग गरेको ना ४९ प ६५१३ नम्बरको बाईक पनि बरामद गरेको जनाएको छ ।