कावासोतीमा खोलाको कटान नियन्त्रणको काम तिव्र रुपमा चल्दै

दयाराम आचार्य
कावासोती । कावासोती नगरपालिका अन्र्तगत पर्ने केरुङ्गे खोलाको विभिन्न स्थानमा बाढीका कारण कटान बढेपछि नियन्त्रणको काम तिव्र रुपमा अगाडि बढाइएको छ । कावासोती नगरपालिकाको वडा नम्बर १, ४, ५, १०, १४मा बाढीका कारण कटान बढेपछि नियन्त्रणका लागि तिव्र रुपमा कार्य अगाडि बढाइएको छ । यस अघि निर्माण गरिएको ड्याम तथा स्परहरू बाढीले भत्काउदा थप कटान र डुबानको जोखिम बढेपछि कावासोती नगरपालिकाबाट नियन्त्रणको लागि काम सञ्चालन गरिएको छ ।
कावासोती नगरपालिका एक, चार, पाँच, दश र चौधका विभिन्न स्थानमा स्थानिएको सहभागिता जुटाएर स्परहरू निर्माणको काम दु्रत गतिमा भइरहेको छ ।
केरुङ्गेखोलाको बाढीले जोखिम बढेपछि दैनिक जसो खोलाको निरीक्षण गर्दै नियन्त्रणको लागि नगरप्रमुख चन्द्र कुमारी पुन स्वयम खटिरहनु भएको छ । नगर प्रमुख सहित, सम्बन्धित वडाका वडा अध्यक्ष र नगरपालिकाका अन्य प्रतिनिधि सहितको टोलीले दैनिक जसो कटान नियन्त्रणका लागि पहल गरिरहेका छन् ।
केही दिन यता विभिन्न वडामा गरी करिब चार सय थान ग्याभिन जाली भर्ने काम भएको छ । ग्याभिन जालीका लागि सिचाई तथा जलस्रोत कार्यालय कावासोतीले समेत सहयोग गरको छ । स्थानीय स्वयम कटान नियन्त्रणकालागि जनश्रमदानमा खटिएका छन् । विभिन्न स्थानमा खोलालाई बीच भागबाट बगाउन च्यानलाईजेसनको काम समेतसँगै चलिहरको छ ।
कावासोती पाँच खएर घारीबाट खोला बस्तीमा प्रवेश गरे कावासोती बजारनै डुवानको जोखिममा रहेको छ । यसले पनि यस स्थानमा कटान नियन्त्रणकालागि पाँच दिन देखि लगातार काम सञ्चालन भइरहेको छ । सिंहनिवास सामुदायिक वनको भवन भएको स्थानमा नदीले कटान तिव्र बनाएपछि नगरपालिकाले जाली तथा अवाश्यक डोजर, ढुङ्गा उपलब्ध गराएका नियन्त्रणको काम भएको छ । यहाँकरिब एक सय ५० जनाले जनश्रमदान गरी कटान नियन्त्रणमा खटिएका थिए ।
यस्तै कावासोती १४ को हेगौलीमा खेतीयोग्य जमिनको कटान बढेपछि यस स्थानमा समेत स्परहरू निर्माणको काम भएको छ । आज नगर प्रमुख चन्द्र कुमारी पुन शिक्षा अधिकृत राजन पाण्डे, वडा नम्बर २का वडा अध्यक्ष लक्ष्मी प्रसाद पौडेल सहितको टोलीले १४मा भएको खोला नियन्त्रणको काम र दशमा पुर्याएको क्षतीको अवलोकन गरेको छ ।
अवलोकनपश्चात नगर प्रमुख पुनले खेती योग्य जमिन कटान नियन्त्रणकालागि आफूहरुको सक्दो प्रयास रहने र स्थानियलाई पनि नियन्त्रणमा जुट्न आग्रह गर्नुभयो । यहाँ समेत स्थानीय जनश्रमदानमा खटिएका छन् । आवश्यक सामाग्रि नगरपालिकाले उपलब्ध गराएको छ ।
केरुङ्ग खोलाको जोखिमको अवस्था हेरेर आफूहरुले विभिन्न स्थामा नियन्त्रणको कामहरू सञ्चालन गरिरहेको नगर प्रमुख चन्द्र कुमारी पुनले बताउनुभयो । नगर प्रमुख पुनले कावासोतीका वडा नम्बर ७मा पहिरोको जोखिममा रहेको केही घरको समेत अवलोकन गर्नुभएको छ । यसको नियन्त्रणकालागि प्राविधिक खटाएर सोही अनुसार कार्य गरिने प्रमुख पुनले बताउनुभयो ।