नवलपुरमा भुँइकटहर बजारसम्म ल्याउन समस्या हुँदा किसान चिन्तित

ज्ञानु पंगेनी / राजु चापागाईं
कावासाेति । नवलपुरको देवचुली नगरपालिका वडा नम्बर पाँचमा उत्पादित भुँइकटहर बजारसम्म ल्याउन समस्या हुँदा किसान चिन्तित बनेका छन् ।
लगातार परेको वर्षाका कारण बाटो अबरुद्ध बनेपछि भुँइकटहर बजारसम्म ल्याउन नपाएको किसानले गुनासो व्यक्त गरेका छन् । यस वर्ष गएका वर्षहरुमा भन्दा बढि नै भुँइकटहर उत्पादन भए पनि बजारसम्म पु¥याउन नपाउदा समस्या भएको किसान समेत रहनुभएका वडा सदस्य पदम गाहा मगरले बताउनुभयो । गाहाले बर्सेनी करीब पाँच सय गोटासम्म भुँइकटहर उत्पादन गर्दै आउनुभएको छ । उक्त भँुइकटहर बिक्री गरेर वर्षैनी करीब ५०/६० हजार रुपैँया आम्दानी हुने गरेको गाहाले बताउनुभयो ।

वडा नम्बर पाँच देवचुली नगरपालिकाको विकट पहाडी क्षेत्र हो । पाँच नम्बर वडामा रहेको बन्दिरपुर र कदमपुरमा भुँइकटहर उत्पादन हुन्छ । भुँइकटहरको पकेट क्षेत्रका रुपमा वडा नम्बर पाँच चिनिन्छ । अन्य उत्पादन खासै राम्रो नहुने भएकाले भुँइकटहर यहाँका बासिन्दाको मुख्य आम्दानीका रुपमा रहेको गाहाले बताउनुभयो । यहाँका करीब एक सय घर धुरीले भुँइकटहर उत्पादन गर्दै आएको गाहाले जानकारी दिनुभयो ।
वर्षाले बाटो अबरुद्ध भएर सवारी नचल्दा किसानले भुँइकटहर डोकोमा बोकेर दलदले बजारसम्म ल्याउने गरेको गाहाले बताउनुभयो । दलदलेसम्म हिडेर आइपुग्न करीब साढे दुई घण्टा समय लाग्ने गरेको गाहाले बताउनुभयो ।
यस्तै अर्का किसान चन्द्र वहादुर ख्याउले मगरले वर्षेनी करीब २ हजार गोटा भुँइकटहर उत्पादन गर्दै आउनुभएको छ । उहाँले करीब डेढ लाखसम्म आम्दानी गर्दै आएको बताउनुभयो । वर्षेनी जसो बाटोको समस्याका कारण समयमा भुँइकटहर बजारसम्म पु¥याउन नपाउदा घाटा ब्यहोर्नु पर्ने मगरले गुनासो गर्नुभयो । कच्ची बाटो भएका कारण ठाउठाउमा पहिरो खसेर बाटो अबरुद्ध हुँदा सवारीमा ढुवानी गर्न नपाएको उहाँले बताउनुभयो । ‘भुँइकटहर डोकोमा बोकेर हिडेरै दलदलेसम्म पु¥याउन पर्छ नभए पाखामै कुहिएर खेर जान्छ । दलदले पुग्न दुईतिन घण्टा लाग्छ । बजारमा पनि दिनभर डुलेर बेच्नु पर्छ । थोकमा दिए सस्तोमा दिनुपर्यो डोकोमा धेरै अट्दैन पर्ता नै पर्दैन । साह्रो दुःख हुन्छ । ’ मगरले भन्नुभयो । सवारीमा ल्याउन पाए एकैपटकमा धेरै ल्याएर थोकमै दिएर जादा सजिलो पनि हुने र नाफा पनि हुने मगरले बताउनुभयो ।
अर्का किसान याम बहादुर बाचेको पनि गुनासो उहि छ । उत्पादित भुँइकटहर बजासम्म ल्याउन सहज भएमा समयमै बिक्री भई आम्दानी राम्रो हुने कुहिएर खेर नजाने उहाँको भनाई छ । बाचेले पनि करीब २ हजार गोटा भुँइकटहर उत्पादन गर्दै आएको बताउनुभयो । वर्षाको समयमा डोकोमा बोकर हिड्दा समेत बाटामा कतै पहिरो जान्छ कि? रुख ढलेर लाग्छ कि? भन्ने त्रासै त्रासमा हिड्नुपर्ने बाचेले बताउनुभयो ।
वडामा पुग्ने बाटोको ठाउँ ठाउँमा पहिरो गएकोले सो पहिरोलाई सफा गर्न र उत्पादित भुँइकटहरलाई बजारसम्म पु¥याउनका लागि पहल भैरहेको देवचुली नगरपालिका वडा न ५ का अध्यक्ष शिव सापकोटाले बताउनुभयो । वडा नम्बर पाँच पहाडी क्षेत्र भएकाले हरेक वर्षाको समयमा बाटोको कारणले जनजीवन प्रभावित हुने गरेको र सो ठाउँमा उत्पादित कृषिजन्य सामाग्री ढुवानीमा समस्या हुने गरेको अध्यक्ष सापकोटाको भनाई छ ।