पुसको पहिलो सातादेखी नवलपुरमा कोरोना परिक्षण

गंगा विश्वकर्मा
चोरमारा। मध्यविन्दु जिल्ला अस्पताल नवलपुरबाट पिसिआर परिक्षणको लागि पुस पहिलो सातासम्म कुर्नुपर्ने भएको छ । कात्तिक १ गते जिल्ला अस्पताललाई संघिय सरकारले सहयोग गरेको पिसिआर मेसिन संघिय संसद तिलक महतले जिल्ला अस्पतालाई हस्तान्तरण गर्नु भएको थियो । तर, आवश्यक पूर्वधार र जनशक्तिको अभावमा सञ्चालनमा आउन ढिलाई भएको हो ।

भौतिक संरचना निर्माण, अन्य औजार र जनशक्ति व्यवस्थापनको लागि समय लाग्ने भएकाले जिल्ला अस्पतालबाट कोभिड–१९ परिक्षणको लागि पुस पहिलो साता कुर्नुपर्ने सुचना अधिकृत छबिलाल सुबेदीले बताउनुभयो । पिसिआर परिक्षणको गर्न ल्याब निर्माणको लागि भौतिक संरचना निर्माणको टेण्डर पक्रिया अगाडी बढाइएको सुवेदीले बताउनुभयो । करिव २० लाख रुपैयामा भौतिक संरचना निर्माणको काम सक्नेगरी कार्य बढाइएको उहाँले बताउनुभयो । गण्डकी प्रदेश सामाजिक बिकास मन्त्रालयले पुर्बाधार निर्माणका लागि १० लाख रुपैया, जनशक्ति व्यवस्थापनको लागि १४ लाख रुपैया, फर्निचरका लागि ५ लाख रुपैया, कम्प्युटरका लागि ५ लाख रुपैया सहित अन्य आवश्यक शिर्षकमा बजेट बिनियोजन गरेको छ ।

ल्याब सञ्चालनको लागि आवश्यक पिसिआर मेसिन संघिय सरकारले सहयोग गरेको हो भने आवश्यक अन्य व्यवस्थापन गण्डकी प्रदेश सरकारले गरेको छ । ल्याब सञ्चालनको लागि आवश्यक जनशक्ति व्यवस्थापनको लागि सुचना प्रकाशन गर्ने तयारीमा अस्पताल रहेको सुवेदीले जानकारी दिनुभयो । उहाँका अनुसार तत्कालका लागि चार जना (बि.एम.एल.टि.) प्रयोगशाला बिज्ञ र २ जना कार्यालय सहयोगिका लागि दरबन्दी माग गरिएको छ । अन्य ३ जना आन्तरिकबाट व्यबस्थापन गरिनेछ ।
नवलपुर जिल्लामा पिसिआर परिक्षणको लागि संघिय संसद तिलक महतको पहलमा संघिय सरकारबाट पिसिआर मेसिन सहयोग भएको हो । पिसिआर परिक्षण शुरुभएपछि दैनिक तिन सय सम्म परिक्षण गर्न सकिने छ । हाल नवलपुरमा संकलित स्वाब परीक्षणका लागि चितवन, हेटौडा, पोखरा लगायतका क्षेत्रमा पठाउने गरिएको छ ।