चोरमारा र अरुणखोलामा सडक मै जथाभावी सवारी पार्किङ हुदा जोखिम

गङ्गा बिश्वकर्मा

चोरमारा ।नवलपुरको मध्यविन्दु नगरपालिकाको मुख्य बजार चोरमारा र अरुणखोला क्षेत्रमा पार्किङ स्थल नहुँदा बजार अस्तव्यस्त बनेको छ । मुख्य राजर्माग संग जोडीएको चोरमारा र अरुणखोला बजारमा पार्किङको व्यबस्था छैन । दैनिकजसो उक्त क्षेत्रभएर सयांै ठुला सवारी साधन चल्ने गर्दछन् । तर सो क्षेत्रमा बस, अटो, मोटरसाइकल लगायतका सवारीका लागि पार्किङको व्यबस्था छैन् ।

घरायसी तथा व्यापारीक प्रयोजनका लागी सामान खरिद गर्न आउने सर्वसाधारण देखि राजमार्गमा गुड्ने लामो तथा छोटो दुरीका सवारीहरु राजमार्ग छेउमा नै रोकिएका हुन्छन् । जसको कारण यस क्षेत्रमा सवारी दुर्घटनाको जोखिम उच्च छ ।

पार्किङको अभावमा बजार गर्न आउने सर्वसाधरणले राजमार्ग छेउ र व्यवसायिक प्रतिष्ठानको छेउमा नै मोटरसाईकल पार्किङ गर्न बाध्य छन् । अटो रिक्सा बिसाउनका लागि पार्किङ स्थल नहुदा निकै समस्या भएको चोरमाराका अटो चालक सुनिता परियारले बताउनुभयो । परियारले सोहि नजिकै भएर लामो तथा छोटा दुरीका सवारी साधनहरु ओहोर दोहोर गर्ने, साईकल तथा पैदल यात्री पनि ओहोरदोहोर गर्ने भएकाले दुर्घटना हुने खतरा भएको बताउनुभयो ।

चोरमाराको उत्तर र दक्षिण दुवै तर्फको बजार क्षेत्रका राजमार्ग साघुरा छन् । जहाँ दुई तर्फबाट सवारी सञ्चालन गर्न समस्या हुने गरेको छ । सर्वसाधरणले बाटो छेउमा नै अव्यवस्थित रुपमा पार्किङ गर्दा सवारी ओहरदोहर र व्यवसाय सञ्चालनमा समेत समस्या हुने गरेको स्थानीय व्यवसायिहरुको गुनासो छ ।

पूर्वपश्चिम महेन्द्र राजमार्ग भएर गुड्ने सवारीहरुको लागि बिसौनी निर्माण गरिएपनि सो स्थानमा एक भन्दा बढी गाडी पार्किङ गर्नु जोखिमपूर्ण छ । सो क्षेत्रपनि मुख्य राजमार्ग नै भएकाले विभिन्न समयमा दुर्घटना समेत हुने गरेको छ ।

मध्यविन्दु–१० अरुणखोलाको बजार क्षेत्रमा जीर्ण बनेको राजमार्ग र अव्यवस्थित पार्किङले समस्या भएको स्थानीय व्यवसायि श्रीकृष्ण सुवेदीले बताउनुभयो । बजार क्षेत्रमा व्यवस्थित रुपमा पार्किङ गर्ने स्थान नभएको उहाँले बताउनुभयो । अरुणखोलाको पुलचोक क्षेत्रमा लामो तथा छोटो दुरीको सवारी सडकमा नै रोक्दा जोखिम हुने गरेको उहाँले बताउनुभयो ।

मध्यविन्दु नगरपालिकाको राजमार्गसंग जोडिएका चोरमारा र अरुणखोला बजार क्षेत्रमा पार्किङको व्यवस्थापन गर्ने योजना भएपनि जग्गाको अभाव कारण व्यवस्थापन गर्न नसकेको मध्यविन्दु नगरपालिकाका नगरप्रमुख चन्द्र बहादुर रानाले बताउनुभयो ।

पार्किङ स्थल निर्माणको लागि नगरपालिकासंग आवश्यक सार्वजनिक जमिन नभएको कारण समस्या भएको उहाँले बताउनुभयो । पार्किङ स्थल व्यवस्थापनको लागि स्थानीय सामुदायिक वनहरुसंग क्षेत्र माग गरेको भएपनि व्यवस्थापन हुन नसकेको उहाँले बताउनुभयो । नगरपालिका अन्य बैकल्पीक उपायहरुबारे समेत छलफलमा रहेको उहाँले बताउनुभयो ।