भ्रष्टचार नियन्त्रणका लागि नागरिक सचेत हुनुपर्छ : प्रजिअ पंगेनी

चोरमारा । नवलपरासी (बर्दघाट सुस्ता पूर्व) जिल्लाका प्रमुख जिल्ला अधिकारी मनमाया पंगेनीले भ्रष्टचार नियन्त्रणको लागि नागरिक सचेत हुनुपर्ने बताउनु भएको छ । कार्य सम्पादनको क्रममा हुनसक्ने भ्रष्टचार नियन्त्रण गर्न नागरिक स्वयम् सचेत बन्न उहाँले आग्रह गर्नु भएको हो ।

सरकारी कार्यालयमा कामको लागि जादा आवश्यक कागजातको बारेमा पूर्व सुचना लिएर सम्पूर्ण कागजातहरुको सहित कार्यालय पुगेको खण्डमा बिचौलिया र कर्मचारीले भ्रष्टचार गर्न नसक्ने उहाँले बताउनुभयो । यदी कही कतै त्यसो भएको पाइएमा सो सम्बन्धी जानकारी जिल्ला प्रशासन कार्यालयमा गराउन समेत आग्रह गर्नुभयो ।

आज मध्यविन्दु नगरपालिकाको तम्सरिया प्रहरी चौकीमा जिल्ला प्रहरी कार्यालय नवलपरासी (बर्दघाट सुस्ता पूर्व)ले आयोजना गरेको नागरिक सुनुवाई कार्यक्रममा बोल्दै उहाँले जिल्लामा भित्र हुने हरेक कानुन विपरितका कार्यहरु रोक्न र त्यसको नियमन गर्न प्रहरीसंगै सबै नागरिकको दायित्व भएको बताउनुभयो ।

जिल्ला प्रहरी कार्यालयका प्रमुख एसपी प्रकाश मल्लले तम्सरीया प्रहरी चौकीकौ स्तरउन्नतिको लागि कार्य अगाडी बढेको भन्दै मध्यविन्दु नगरपालिका भित्रका कोल्हुवा र अरुणखोला प्रहरी चौकी समेत स्तरउन्नतीको प्रक्रियामा रहेको बताउनुभयो । नागरिक सुनुवाई कार्यक्रममा स्थानीयले चोरमारा प्रहरी चौकीमा जनशक्ति कम भएको बारे उठाएको प्रश्नको जवाफ दिदै मल्लले जिल्ला प्रहरी कार्यालय नजिकै रहेको कारण यहाँ कुनै पनि समयमा जनशक्तिको अभाव नहुने बताउनुभयो ।

कार्यालय व्यवस्थापनको विषयमा उठेको जिज्ञासाको जवाफ दिदै उहाँले तम्सरिया प्रहरी चौकीको नाममा जग्गा नभएको कारण भौतिक संरचना बन्न नसकेको भन्दै जग्गा प्राप्तिमा सबै पक्षको सहयोग आवश्यक रहेको बताउनुभयो ।

विद्यालय तहका विद्यार्थीहरुलाई कानुन र न्यायको बारेमा जानकारी दिनको लागि ठोस कार्यक्रम बनाएर कार्यालय अगाडी बढेको भन्दै उहाँले लागुऔषध दुव्र्यसनी नियन्त्रणमा समुदाय सबै सचेत हुन आवश्यक रहेको बताउनुभयो ।

सुनुवाईको क्रममा ट्याक्टर व्यवसायिहरुले उठाएको सवालको जवाफ दिदै उहाँले प्रहरीले विभिन्न तहमा बनेका कानुनहरुको कार्यान्वयन भएको छ वा छैन सो को अनुगमन र कार्यान्वय गराउने दायित्व अन्र्तगत नदीजन्य पदार्थको चोरी निकासी रोक्न प्रहरी क्रियाशिल भएको बताउनुभयो । उहाँले यससम्बन्धि अधिकार स्थानीय तहमा भएको भन्दै त्यस विषयमा स्थानीय तहसंग समन्वय गर्न आग्रह गर्नुभयो ।

मध्यविन्दु नगरपालिकाका नगरप्रमुख चन्द्र बहादुर रानाले नगरपालिकाबाट हुने कार्यसम्पादनलाई प्रभावकारी बनाउन आफु प्रतिबद्ध रहेको बताउनुभयो । तम्सरिया प्रहरी चौकी स्थापना पस्चात यस क्षेत्रमा भएको कामहरुको प्रशंसा गर्दै उहाँले प्रहरी कार्यालयको नाममा जग्गा प्राप्तिको लागि आवश्यक सहयोग गर्ने प्रतिबद्धता जनाउनुभयो । ट्याक्टर तथा टिप्पर व्यवसायिहरुले उठाएको जिज्ञासाको जवाफ दिदै उहाँले खोला ठेक्का प्रक्रियाको लागि नगरपालिका अन्तिम चरणमा रहेको जानकारी दिनुभयो । भूमीहिन दलित, सुकुम्बासी तथा अव्यवस्थीत बसोबासीहरुको लगत संकलनको काम निकट भविश्यमा शुरु हुने बताउनुभयो ।

मध्यविन्दु नगरपालिका–७ का वडा अध्यक्ष अमृत ज्ञवालीले प्रहरीले गरेको नागरिक सुनुवाईमा सहभागिहरुले नगरपालिकासंग सम्बन्धित सवालहरु समेत प्रस्तुत गरेकामा धन्यवाद दिदै नगरपालिकाको समेत प्रत्येक ६/६ महिनामा सार्वजनिक सुनुवाई कार्यक्रम गर्ने प्रतिवद्धता व्यक्त गर्नुभयो ।

नागरिक सुनुवाई कार्यक्रममा सहभागीहरुले ढुंगा गिटी, माटो, सुरक्षा व्यवस्थापन, लागु औषध दुव्र्यसनी, सवारी दुर्घटना लगायतका विषय सहित नगरपालिकाका बिभिन्न सरोकारका विषयमा सवाल उठाएका थिए ।