कोभिड विरुद्धको खोप अभियान निरन्तर चल्छ : मन्त्री त्रिपाठी

दयाराम आचार्य 
डण्डा। सरकारले शुरु गरेको कोभिड १९ विरुद्धको खोप अभियान निरन्तर रुपमा संचालन हुने स्वास्थ्य तथा जनसंख्या मन्त्री हृदेश त्रिपाठीले बताउनु भएको छ । नवलपरासी (बर्दघाट सुस्तापूर्व ) नवलपुरको मध्यविन्दु जिल्ला अस्पतालको निरीक्षणका क्रममा उहाँले खोप अभियान नरोकिने र निरन्तर रुपमा संचालन हुने बताउनु भएको हो । ‘अहिले पहिलो चरणमा खोप अभियान संचालन भईरहेकै छ, थप खोप ल्याउनेछौ’ मन्त्री त्रिपाठीले भन्नुभयो– यसलाई निरन्तर रुपमा संचालन गर्नेछौ । पहिलो चरणको खोप अभियान संचालन भईरहदा पारदर्शी ढङ्गबाट खोप खरिदको पक्रिया अगाडी बढाईने उहाँले बताउनुभयो ।
कोभिड १९ विरुद्धको लडाई नयाँ चरणमा प्रवेश गरेको समेत उहाँले बताउनुभयो । अब कोभिडको रोकथामकालागि खोप लगाउने चरणमा प्रवेश गरेको भन्दै उहाँले अन्य स्वास्थ्य सावधानी भने कायमै राख्न आग्रह समेत गर्नुभएको छ । अझै पनि कोभिड १९ अनुसन्धानकै क्रममा रहेको छ, अझै पनि यसको संक्रमण हुने अवस्था कसरी के हुन्छ भन्ने नभएकाले उहाँले मास्क लगाउने, भिडभाडमा कम जाने लगाएतका स्वास्थ्य सावधानी अपनाउन आग्रह गर्नुभयो ।
सरकारले उचित समयमा खोप ल्याएको बताउदै यसको प्रयोगमा कुनै आशंका नगर्न समेत उहाँले सबैमा आग्रह गर्नुभएको छ । ‘कतिपय आशंका छ, नेपाली जनतामा परिक्षणकालागि खोप प्रयोग गरिएको भनेर , त्यस्तो हुदैन हामिले अन्य देशमा समेत प्रयोग भएको, र गुणस्तरीय ,प्रमाणीत खोप मात्र प्रयोग गर्छौ’ मन्त्री त्रिपाठीले भन्नुभयो । प्राप्त खोप कुनै खेर नजानी गरेर प्रयोग गर्न समेत चिकित्सकलाई उहाँले आग्रह गर्नुभयो । ‘अहिले खोप बहुमुल्य छ, कुनै खेर नजानी गरेर प्रयोग होस’ उहाँले भन्नुभयो । दक्षिण एसियामै भारत पछी नेपालले खोप अभियान संचालन गरेको समेत मन्त्री त्रिपाठीले बताउनुभयो ।
जिल्ला अस्पतालका मेडिकल सुपरिटेन्डेण्ट डाक्टर सुनिलराज गौतमले मन्त्री त्रिपाठी समक्ष अस्पतालको तत्कालिन अवस्था र खोप अभियानका बारेमा जानकारी गराउनुभएको थियो । उहाँले अस्पतालका तर्फबाट मागपत्र समेत पेश गर्नुभएको छ । अस्पतलामा ३१ जनाको स्थाई दरबन्दी रहेपनि हाल जम्मा छ जनाको मात्रै स्थाई दरबन्दी रहकाले चाँडै दरबन्दीको पुर्ती गर्न , अस्पतालको थप प्रसुती सेवा विस्तारका लागि आवश्यक जनशक्ती र उपकरणको व्यवस्था गर्न , निर्माणाधिन अस्पतालको भवन निर्माणको काम सक्न थप वजेटको व्यवस्थापन गर्न माग गरिएको अस्पतालका मेडिकल सुपरिटेन्डेण्ट डाक्टर गौतमले बताउनुभयो ।