अदालतको फैसला स्वीकार गर्छौं : कांग्रेस नेता नेपाली

चोरमारा । नेपाली कांग्रेस गण्डकी प्रदेश संसदीय दलका नेता कृष्णचन्द्र नेपालीले प्रतिनिधि सभा विघटनको मुद्दा अदालतमा बिचारधिन रहेकाले अदालतबाट आउने फैसलालाई स्वीकार्ने बताउनु भएको छ । संविधानको व्याख्या गर्ने अधिकार अदालतलाई रहेको भन्दै उहाँले अदालतले प्रतिनिधि सभा पुर्नःस्थापपना गरे प्रतिनिधि सभामा सहभागि हुने र विघटनलाई मान्यता दिए चुनावको तयारीमा जाने बताउनुभयो ।

संविधानमा प्रधानमन्त्रीलाई प्रतिनिधि सभा विघटन गर्ने अधिकार कुनैपनि धारामा नभएको भएपनि त्यसको अन्तिम व्याख्या गर्ने अधिकार अदालतलाई भएको कारण सो निर्णय सबैले स्वीकार गर्नुपर्ने बताउनुभयो ।

कोल्हुवा खानेपानी तथा सरसफाई उपभोक्ता समिति मध्यविन्दुको सातौं साधारण सभालाई सम्बोधन गर्दै प्रमुख अतिथि नेपालीले नेपालमा लाग्ने ८० प्रतिशत सरुवा रोग पानीको कारण लाग्ने गरेको विभिन्न अनुसन्धानले देखाएको भन्दै सबै उपभोक्तालाई स्वच्छ र शुद्ध पिउनेपानीको पहुँच स्थापित गराउन आवश्यक रहेको बताउनुभयो ।

गण्डकी प्रदेश सभा सदस्य एवम् नेपाली कांग्रेस नवलपुरका सभापति बिष्णु लामिछानेले नेपाली जनताले नेकपालाई पाँच वर्ष सरकार सञ्चालन गर्ने कार्यादेश दिएको भएपनि पार्टी भित्रको आन्तरिक किचलोमा सिंगो राष्ट्रलाई बन्धक बनाएको भन्दै नेपाली जनताले माफ नगर्ने बताउनुभयो ।

मध्यविन्दु नगरपालिकाको १,२ र ३ नम्बर वडामा खानेपानी सेवा दिने कोल्हुवा खानेपानी संस्थामा हाल एक हजार दुई ५० उपभोक्ता रहेकोमा हाल ६ सय ८० घरधुरीलाई धारा जडान भइसकेको छ भने थपलाई तत्काल वितरण गर्ने गरी काम भइरहेको समितिका अध्यक्ष श्रीधर शर्माले जानकारी दिनुभयो ।

साधारणसभामा बोल्दै खानेपानी तथा सरसफाइ उपभोक्ता महासंघ नवलपुरका अध्यक्ष खिमानन्द भुसाल, खानेपानी तथा सरसफाई इकाइ कार्यालय नवलपुरका इञ्जिनियर महेन्द्र आचार्यले खानेपानीको पहुँच सबै नागरिकलाई पुर्याउन स्थानीय स्तरमा उपभोक्ता समितिले पुर्याएको योगदान महत्वपूर्ण रहेको बताउनु भएको थियो ।

साधारणसभामा आर्थिक प्रतिवेदन सहसचिव सुवास नेपालले, वार्षीक गतिविधि सचिव रामभक्त अधिकारीले, लेखा प्रतिवेदन लेखा संयोजक नेत्र भण्डारीले र प्रगति प्रतिवेदन सहित आगामी कार्ययोजना श्रीधर शर्माले प्रस्तुत गर्नु भएको थियो ।