दुम्कीबास र गैंडाकोटको हिरासतमा पुस्तकालय स्थापना


चोरमारा । नवलपरासी पूर्व नवलपुरको दुई वटा इलाका प्रहरी कार्यालयको हिरासतमा पुस्तकालय स्थापना गरिएको छ । जिल्लाको इलाका प्रहरी कार्यालय गैंडाकोट र इलाका प्रहरी कार्यालय दुम्कीबासमा हिरासतमा किताब कार्यक्रम मंगलबारबाट शुरु गरिएको हो । यस अघि माघ ५ गते जिल्ला प्रहरी कार्यालयमा यो कार्यक्रम शुरु भइसेकेको थियो । हिरासतमा रहने व्यक्तिहरुको लागि पुस्तकालयको ढाँचामा किताब राख्ने व्यवस्था गरिएको छ । दुवै स्थानमा नवलपरासी पूर्वका प्रमुख जिल्ला अधिकारी मनमाया भट्टराई पंगेनीले पुस्तकालय स्थापना उद्घाटन गरेकी हुन् ।


कार्यक्रमको उद्घाटन गर्दै प्रमुख जिल्ला अधिकारी मनमाया भट्टराई पंगेनीले हिरासतमा रहेका व्यक्तिहरुलाई शिक्षा प्रदान गर्न र उनिहरुको व्यवहारमा परिवर्तन गराउन हिरासतमा किताब कार्यक्रम प्रभावकारी हुने बताईन् । रत्नाकर डाँकुबाट बालमिक्की बनेको प्रशंग उल्लेख गर्दै उनले ज्ञानले मानिस भित्रको व्यवहारमा परिवर्तन ल्याउन मदत पुग्ने भन्दै हिरासतमा रहदा यहाँ उपलब्ध किताबहरुको अध्ययन र सिकाईलाइ कार्यान्वयन गर्न सबैलाई अनुरोध गरिन् ।

जिल्ला प्रहरी प्रमुख एसपी प्रकाश मल्लले जिल्ला प्रहरी कार्यालयमा यस अघिनै कार्यक्रम शुरु भएको उल्लेख गर्दै हिरासतमा प्रहरीबाट यातना हुन्छ भन्ने मानसिकताबाट अब त्यहाँ ज्ञान र शिक्षा प्रदान हुन्छ भन्ने सन्देश प्रवाह भएको बताए ।

इलाका प्रहरी कार्यालय दुम्कीबास विनयी त्रिवेणीमा लायन्स क्लवको सहयोग र इलाका प्रहरी कार्यालय गैंडाकोटमा विभिन्न संस्थाहरुको सहयोगमा हिरासतमा किताब कार्यक्रम शुरु गरिएको हो । कार्यक्रममा बोल्दै इलाका प्रहरी कार्यालय दुम्कीबासका प्रहरी निरिक्षक बिकास बमले गण्डकी प्रदेश प्रहरी प्रमुख र जिल्ला प्रहरी कार्यालय प्रमुख बिच भएको कार्य सम्पादन सम्झौता अनुरुप नवप्रवर्तनात्मक कार्यक्रम अन्र्तगत हिरासतमा कार्यक्रम शुरु गरिएको बताए ।

नवलपुरमा विद्यार्थीसंग प्रहरी कार्यालय, समुदायमा सरकारी वकिलको कार्यालय कार्यक्रम सञ्चालनमा रहेको प्रमुख जिल्ला अधिकारी पंगेनीले बताईन् । जिल्लामा कानुन र न्यायको विषयमा आम सर्वसाधरण सम्म सहि सुचनाको पहुँच स्थापना गर्नको लागि कार्यक्रमहरु सञ्चालन भइरहेको उनको भनाई छ ।

फेसबुकबाट कमेन्ट गर्नुहोस |

सम्बन्धित शिर्षकहरु
  • दुम्किबासबाट लागुऔषध सहित पोखराका निरज पक्राउ
  • कावासोती नगरपालिकाको आठौँ नगरसभा सम्पन्न
  • जिल्ला युवा समिति नवलपुरको अध्यक्षमा हिमाल सिंह ठकुरी
  • मैनाघाट जोड्ने पक्की पुल निर्माण हुदै
  • © 2021: Namuna Post All Rights Reserved. Designed by: GOJI Solution