यातायात कार्यालय नवलपुरले रोक्यो फरक प्रदेशको सवारी नवीकरण

दयाराम आचार्य
कावासोती । यातायात व्यवस्था कार्यालय नवलपुरबाट फरक प्रदेशका सवारीको कर संकलन र नवीकरण रोकिएको छ । भौतिक पूर्वाधार ,शहरी विकास तथा यातायता व्यवस्था मन्त्रालयबाट फरक प्रदेशका सवारी साधानको कर संकलन र नवीकरण सम्बन्धी परिपत्र नआएपछी उक्त कार्य रोकिएको हो । परिपत्र नआएकाले कावासोती स्थित कार्यालयबाट गण्डकी प्रदेश बाहेकका अन्य प्रदेशमा दर्ता भएका सवारीको कर तथा नवीकरणकार्य रोकिएको यातायात व्यवस्था कार्यालय नवलपुरका प्रमुख ज्ञान प्रसाद भुषालले बताए ।
मन्त्रालयबाट अघिल्ला बर्षहरुमा सवारी धनीको ठेगाना गण्डकी प्रदेश रहेकाहरुको सवारी दर्ता अन्य प्रदेशमा भएको भएपनी कर संकलन र नवीकरण हुदै आएको थियो । तर अहिले यस आर्थिक वर्षकालागि मन्त्रालयले कर संकलन र नवीकरण यथास्थितीमा गर्न भनी कुनै पत्रचार नभएकाले आफुहरुले फरक प्रदेशमा दर्ता भएका सवारीको कर संकलन र नवीकरण नगरेको कार्यालय प्रमुख भुषालले बताए । ‘हामीलाई प्रत्यक वर्ष एक कर संकलनकालागि मन्त्रालयबाट पत्र आउथ्यो , सोही आधारमा वर्ष भरी सवारी धनीको ठेगाना गण्डकी प्रदेशमा भएका तर सवारी दर्ता अन्य प्रदेशमा भएपनी नवीकरण गर्नेकाम गर्थ्यौं ’ यातायात व्यवस्था कार्यालय नवलपुरका प्रमुख भुषालले भने –अहिले यस्तो परिपत्र आएको छैन्, आए लगतै नवीकरण गछौं ।

अहिले साविकको गण्डकी , धौलागिरीबाट दर्ता भएका र कावासोतीबाटनै नयाँ सवारी दर्ता गरेकाहरुको मात्रै कर संकलन र नवीकरण गरिएको उनले बताए । यता फरक प्रदेशका सवारीको कर संकलन र नवीकरण रोकिदा सेवाग्राही भने समस्यामा परेका छन् । बाग्मती, लुम्बिनी , नारायणीबाट दर्ता भएका सवारी नवलपुरमा धेरै सञ्चालनमा रहेका छन् । यस बाहेक चितवन क्षेत्रमा संचालनमा रहने सवारी समेत कर बुझाउन र नवीकरणका लागि नवलपुर स्थित कार्यालयमा आउने गर्दथे । अहिले यहाँको कार्यालयले सवारी कर र नवीकरण नगर्दा यस क्षेत्रका सेवाग्राही समस्यामा परेका छन् । नवलपुरको कार्यालयले नवीकरण नगर्दा अब अन्यत्र जानुपर्दा समस्या हुने स्थानीय निरोज सिंञ्जालीले बताए । ‘मेरो ठेगाना नवलपुरकै छ, सवारी नारायणीमा दर्ता भएको छ, अब यहीबाट हुने काम बिरगंञ्ज जानुपर्ने भएको छ ,यसले धेरै समस्या पार्योनी’ सिंञ्जालीले भने । ‘कर भनेको सहज रुपमा तिर्नुपर्ने बनाउनुपर्ने हो , जहाँको कार्यालयले लिएपनी राज्यकै अङ्गहुन, प्रविधिको यो समयमा पनि यती अप्ठ्यारो बनाएर जहाँको हो दर्ता हो त्यही जा भन्नु ठिक भएन’ अर्का सवारी धनी पे्रम कुमार ठकुरीले भने ।

यातायात व्यवस्था कार्यालय नवलपुरका प्रमुख भुषालले भने आफुहरुले यस विषयमा कर संकलन र नवीकरणकालागि अनुमती दिन पत्रचार गरिसकेको बताए । ‘हामिले सेवाग्राहीका समस्या बुझेका छौ, पत्रचार समेत सम्बन्धीत निकायमा गरेका छौं’ कार्यालय प्रमुख भुषालले भने –सायद चाडै यस विषयमा निकास आउने छ ।