नवलपुरका गाहा गण्डकीको आन्तरिक मामिला तथा कानुन मन्त्री

कावासोती । पूर्वि नवलपरासी (नवलपुर)का रोशन गाहा मगर गण्डकी प्रदेशको आन्तरिक मामिला तथा कानुन मन्त्री बनेका छन् । गाहा नवलपुर क्षेत्र नम्बर १(२) बाट गण्डकी प्रदेश सभा सदस्यमा निर्वाचित सांसद हुन् । मंगलबार गण्डकी प्रदेश सरकार बिस्तारको क्रममा गण्डकी प्रदेश सभामा दोहोरिएर निर्वाचित भएका गाहा आन्तरिक मामिला तथा कानुन मन्त्री बनेका हुन् । गाहा २०७४ को निर्वाचनमा पनि प्रदेश सभा सदस्यमा निर्वाचित भएका थिए । गाहा पृथ्वीसुब्बा गुरुङ मुख्यमन्त्री भएको बेला पनि मन्त्रीको दाबेदार थिए । तर, त्यस पटक उनी मन्त्री बन्न पाएनन् । मन्त्री गाहा पृथ्वीसुब्बा नेतृत्वको सरकार ढलेपछि प्रदेशसभामा सार्वजनिक लेखा समिति सभापति भएका थिए । नेकपा एमाले प्रदेश कमिटि सचिवालय सदस्य समेत रहेका मन्त्री गाहा कावासोती २ का स्थायी बासिन्दा हुन् । २०३६ साल देखि कम्युनिस्ट पार्टीको विद्यार्थी सङ्गठन अनेरास्ववीयूबाट राजनीतिक यात्रा सुरू गरेका गाहा २०३६ सालको जनमत संग्रहको बेला २६ दिन जेल जिवन समेत बिताएका थिए । २०४३ सालमा जनपक्षीय उप प्रधानपञ्च र २०४९ साल र २०५४ सालमा गाविस अध्यक्ष विजयी थापा संविधान सभा सदस्य समेत हुन् । मंगलबार गाहा सहित गण्डकी प्रदेश सरकारका ३ मन्त्रीले पद तथा गोपनीयताको शपथ लिएका छन् ।

मंगलबार मुख्यमन्त्री खगराज अधिकारीले एमाले नेता रोशन गाहा र वेदबहादुर गुरुङ साथै माओवादी केन्द्रका रेशमबहादुर जुग्जालीलाई मन्त्री नियुक्त गरेका थिए । उनीहरुलाई मंगलबार साँझ प्रदेश प्रमुख पृथ्वीमान गुरुङले पद तथा गोपनीयताको शपथ लिएका हुन् । उनीहरुको नियुक्तिसँगै ७ सदस्यीय गण्डकी सरकारले पूर्णता पाएको छ । यसअघि नै माओवादीका हरिबहादुर चुमान, एमालेकी सीता सुन्दास र राप्रपाका पञ्चराम गुरुङ मन्त्री नियुक्त भइसकेका थिए । मन्त्रीहरुको जिम्मेवारी पनि मंगलबार नै तोकिएको छ । एमालेका रोशन गाहाले आन्तरिक मामिला , सीता सुन्दासले आर्थिक मामिला र वेदबहादुर गुरुङले कृषि तथा जलस्रोत मन्त्रालयको जिम्मेवारी पाएका छन् । माओवादी केन्द्रका हरिबहादुर चुमानलले भौतिक पूर्वाधार तथा यातायात, रेशमबहादुर जुग्जालीले उद्योग, पर्यटन, वन तथा वातावरण र राप्रपाका पञ्चराम गुरुङले सामाजिक विकास मन्त्रालयको जिम्मेवारी पाएका छन् ।