असार ३० गते कावासोतीमा कोरा साइक्लिङ च्यालेन्ज हुँदै

कावासोती । नवलपुरको कावासोतीमा कोरा साइक्लिङ च्यालेन्ज हुने भएको छ । कावासोती साइक्लिङ गुरुपको आयोजनामा यही असार ३० गतेका दिन कोरा साइक्लिङ च्यालेन्ज आयोजना गरिएको ग्रुपका अध्यक्ष अजय श्रेष्ठ (ज्योती)ले जानकारी दिए । कावासोती साइक्लिङ गुरुपले आज(बुधबार) कावासोतीमा पत्रकार सम्मेलन गरि असार ३० गते कोरा साइक्लिङ च्यालेन्ज गर्न लागेको जानकारी गराएको हो । असार ३० गते बिहान कावासोती स्थित नर्मदेश्वर शिवालय मन्दिर परिसरबाट कार्यक्रम सुरु हुने अध्यक्ष श्रेष्ठले जानकारी दिए ।

५० किलोमिटरको यात्रा रहने कोरा साइक्लिङ च्यालेन्जमा सहभागीहरूले जिल्लाका तीनवटा स्थानीय तहलाई छुने छन् । कावासोती हुँदै देवचुली छुँदै मध्यविन्दुका विभिन्न स्थान परिक्रमा गरि पुन ः कावासोती शिवालय मन्दिर परिसरमा आएर कार्यक्रम समापन हुने छ । स्वास्थ्यका लागि साईक्लिङको महत्व बुझाउन, धार्मिक स्थलहरूको प्रचार र यहाँका पर्यटकीय क्षेत्रको प्रर्वद्धन गर्न कोरा साइक्लिङ च्यालेन्ज गर्न लागिएको आयोजकले बताएको छ ।

उक्त कार्यक्रममा करिब १०० जना सम्म सहभागि हुन सक्ने आयोजकको भनाई छ ।