छैठौं राइनो संरक्षण गोल्डकप फुटबल प्रतियोगिता माघ २७ गतेदेखि हुने

नवलपुर । पूर्वी नवलपरासीको मध्यविन्दु २ कोल्हुवामा छैठौं राइनो कप फुटबल प्रतियोगिता हुने भएको छ । प्रतियोगिता माघ २७ गतेदेखि फाल्गुन ९ गतेसम्म राइनो कपको खेल मैदानमा हुने भएको छ । प्रतियोगितामा विभागीय टिम प्रदेश स्तरको टिम सहित गरी १२ टिमको सहभागिता रहने आयोजकले जनाएको छ । प्रतियोगितामा प्रथम हुनेले १० लाख र द्वितीय हुनेले ५ लाख रुपैयाँ पुरस्कार पाउने छन् ।

विश्वकै दुर्लभ १ सिंगे गैडा संरक्षणका लागि भन्दै विगत २० बर्षदेखि राइनो संरक्षण कप फुटबल प्रतियोगिता आउँदै गरेकोमा पछिल्लो समय सोही नाममा राष्ट्रिय स्तरका प्रतियोगिता गरिन थालिएको हो । प्रतियोगिताको बारेमा जानकारी दिन शनिबार खेल मैदानमा आयोजक संस्था नन्दभाउजु मध्यवर्ती उपभोक्ता समिति र राइनो कप क्लबले पत्रकार सम्मेलनको आयोजना गरिएको थियो ।

पत्रकार सम्मेलनमा समितिका अध्यक्ष दोमन भण्डारीले प्रतियोगिताका लागि सहयोग जुटाउने कार्य भईरहेको बताए । कार्यक्रममा मध्यविन्दु नगरपालिकाका नगर प्रमुख भिमलाल अधिकारी, प्रदेश खेलकुद परिषदका सदस्य सचिव श्रीधर शर्मा लगायतले शुभकामना राखेका थिए ।