ईन्धनमा चुर्लुम्म नवलपुरका जनप्रतिनिधि, कुन पालिकाले कति खर्चियो ?

कावासोती । जनताको सेवामा निस्वार्थ खटिने भन्दै शपथ लिएका जनप्रतिनिधिहरु सेवाको नाममा बजेट दोहनमा लागेको पाइएको छ । क्षेत्रको विकास र स्तरोन्नतिका खातिर विश्वास गरेर जनताले निर्वाचित गराएका जनप्रतिनिधिहरुले तोकिएको भन्दा बढी सुविधा लिएको पाइएको हो । जनप्रतिनिधिहरुले विविध शिर्षकमा नियमानुसार नै सेवा सुविधा वापत रकम प्राप्त गर्छन् । तर नवलपुरका जनप्रतिनिधिहरु सेवाभन्दा पनि सुविधामै लालायित देखिएका छन् । जसको पछिल्लो उदाहरण हो इन्धनमा भएको खर्च ।
गण्डकी प्रदेश राजपत्र (२०७७/३/२६) अनुसार अनुसुचीमा नगरपालिका पदाधिकारी तथा सदस्यले पाउने सुविधामा नगरपालिका प्रमुख तथा उपप्रमुखले वार्षिक १०८० लि. डिजेल पाउने उल्लेख छ ।
कुन पालिकाले ईन्धनमा कति खर्चियो ?
गैंडाकोट नगरपालिका
महालेखा परीक्षकको कार्यालयद्धारा प्रकाशित आर्थिक वर्ष २०७९/८०को अन्तिम लेखापरीक्षण प्रतिवेदन अनुसार गैंडाकोट नगरपालिकाले पदाधिकारीको इन्धन खर्चमा ६ लाख २० हजार ८१ रुपैयाँ बढी भुक्तानी लिएको छ ।
पदाधिकारीको गाडी नम्बर बा २ झ ३४०४ले आर्थिक वर्ष २०७९/८० मा ३ हजार ६ सय १४ लिटर र बा २ झ १३४९ नम्बरको गाडीमा ३ हजार २ सय ५५ लिटर ईन्धन खर्चिएको हो ।
देवचुली नगरपालिका
देवचुली नगरपालिकाका पदाधिकारीले पनि तोकिए भन्दा बढी इन्धन सुविधा लिएका छन् । प्रतिवेदन अनुसार नगरपालिका प्रमुख हरी प्रसाद न्यौपानेले प्रयोग गर्ने गाडी बा २ झ ४०२३ ले ४ हजार २० लिटर र उप प्रमुख पार्वता तिवारीले प्रयोग गर्ने बा २ झ १२६० नम्बरको गाडीले ५ हजार १ सय ३१ लिटर इन्धन बुझेका छन् । नगरपालिकाले प्रमुख र उप प्रमुखको गाडीका लागि मात्रै १३ लाख २८ हजार २ सय ९० रुपैयाँ खर्चिएको छ ।
कावासोती नगरपालिका
यता कावासोती नगरपालिकाले ईन्धन खर्चका लागि आवश्यक पर्ने कार्यविधि नै नबनाएको पाइएको छ ।
नगरपालिकाले पदाधिकारीका लागि २५ लाख ९९ सय हजार ९८ रुपैयाँ, कार्यालय प्रयोजनका लागि ३७ लाख ९९ हजार १ सय ९३ र अन्य प्रयोजनका लागि ९० हजार ३ सय २९ गरि कुल ६४ लाख ८८ हजार ६ सय २० रुपैयाँ ईन्धनमा खर्चिएको छ ।
मध्यविन्दु नगरपालिका
महालेखा कार्यालयले मध्यविन्दु नगरपालिकालाई पनि ईन्धन प्रयनेगको कार्यविधि बनाई खर्चमा मितव्ययीता ल्याउन सुझाएको छ ।
नगरपालिकाले आर्थिक वर्ष २०७९/८० मा पदाधिकारीका लागि ६ लाख ४१ ह्जार २ सय ७२ रुपैयाँ, कार्यालय प्रयोजनार्थ २३ लाख १७ हजार ५ सय ५५ रुपैयाँ र अन्य प्रयोजनका नाममा १० लाख ३७ हजार ४ सय ८८ रुपैयाँ गरि कुल ३९ लाख ९६ हजार ३ सय १५ रुपैयाँ ईन्धनमा खर्चिएको छ ।

बुलिङटार गाउँपालिका
बुलिङटार गाउँपालिकाले व्यवस्थित रुपमा ईन्धनको लगबुक नराखेको पाइएको छ । यस्तै दुई पाङ्ग्रे सवारी साधनका लागि दिइने ईन्धनको अभिलेख अध्यावधिक नगरिएको महालेखाले प्रतिवेदनमा उल्लेख गरेको छ ।प्रतिवेदन अनुसार गाउँपालिकाले कार्यालय प्रयोजनका लागि गाडी, जेसिबि तथा अन्य सवारीको शिर्षकमा २६ लाख ३ हजार २ सय ७२ रुपैयाँको ईन्धन खर्चिएको देखिएको छ ।
हुप्सेकोट गाउँपालिका
हुप्सेकोट गाउँपालिकामा आर्थिक वर्ष २०७९/८० मा ६ लाख २३ हजार ४ सय २९ रुपैयाँ ईन्धनका नाममा अनियमितता भएको महालेखाको प्रतिवेदनमा उल्लेख छ ।जसअनुसार गाउँपालिका अध्यक्ष लक्ष्मी देवी पाण्डेले ४ हजार १ सय ७० लिटर र उपाध्यक्ष पुर्ण सिं राना मगरले २ हजार ७ सय १९ लिटर ईन्धन सुविधा लिएका छन् ।
बौदीकाली गाउँपालिका
बौदीकाली गाउँपालिका उपाध्यक्ष डिल कुमारी सरुले दोहोरो सुविधा प्रयोग गरेको देखिएको छ । गण्डकी प्रदेशको गाउँसभा, नगरसभा र जिल्ला समन्वय समितिका सदस्यले पाउने सुविधा सम्बन्धमा व्यवस्था गर्न बनेको ऐन २०७७को दफा १६ मा ऐनले निर्धारण गरेकोमा बाहेक अन्य सुविधा नपाउने व्यवस्था छ । समन्वय समितिको कार्यालयले उपाध्यक्षलाई उल्लेखित आर्थिक वर्षको भाद्र देखि माघसम्मको १२ हजार रुपैयाँको दरले ७२ हजार रुपैयाँ भुक्तानी दिएकोमा पालिकाबाट समेत सवारी सुविधा लिएको पाइएको छ । उक्त ७२ हजार रुपैयाँ असुल गर्नुपर्ने महालेखाले जनाएको छ ।
यस्तै गाउँपालिका अध्यक्षले पनि नियम भन्दा बढी १ हजार ५ सय २७ लिटर ईन्धन सुविधा लिएका छन् ।

विनयी त्रिवेणी गाउँपालिका
सार्वजनिक खर्चमा मितव्ययिता र प्रभावकारिता कायम गर्ने सम्बन्धी नीतिगत मार्गदर्शन, २०७५ मा सवारी साधनको ईन्धन मर्मत खर्चमा एकरुपता ल्याउन निश्चित मापदण्ड बनाई कार्यान्वयनमा ल्याउनुपर्ने व्यवस्था गरेको छ । तर विनयी त्रिवेणी गाउँपालिकाले मापदण्ड नै तयार नगरेको पाइएको छ भने वार्षिक ईन्धन खर्च र उपयोगको विवरण खुल्ने गरि अभिलेख पनि राखेको छैन ।
गाउँपालिकाले उल्लेखित मापदण्डको पालना नगरी ३६ लाख २९ हजार रुपैयाँ ईन्धनमा खर्चिएको छ । महालेखाले गाउँपालिकालाई ईन्धनमा भएको खर्चको यकीन गरी असूल फस्र्यौट गर्न भनेको छ ।