कांग्रेस नवलपुरका प्रभावशाली युवा गोकुल सापकोटा राष्ट्रिय स्वतन्त्र पार्टीमा प्रवेश

नवलपुर ।  नेपाली कांग्रेस नवलपुरका सक्रिय युवा नेता गोकुल सापकोटाले पार्टी परित्याग गरी राष्ट्रिय स्वतन्त्र पार्टी (रास्वपा) मा प्रवेश गरेका छन्। रास्वपाले उनलाई पार्टीको केन्द्रीय सार्वजनिक लेखा समीक्षा विभागको प्रमुखमा पनि मनोनयन गरेको छ।

नेविसंघबाट आफ्नो राजनीतिक यात्रा प्रारम्भ गरेका सापकोटाले नेपाली कांग्रेसको महासमिति सदस्यसम्मको जिम्मेवारी वहन गरेका थिए। देशका विभिन्न आन्दोलनमा सक्रिय भूमिका निर्वाह गरेको अनुभव सुनाउँदै उनले लोकतन्त्रको रक्षा, मानव अधिकारको स्थायित्व र सामाजिक रूपान्तरणका संघर्षमा काँधमा काँध मिलाएर हिँडेको दिनलाई गर्वका साथ स्मरण गरेका छन्।

सामाजिक सञ्जालमार्फत पद तथा जिम्मेवारीबाट अलग भएको जानकारी दिँदै सापकोटाले लेखेका छन्, “आजबाट नेपाली कांग्रेसको कुनै पनि पदीय जिम्मेवारी, साधारण सदस्य समेत नरहेको जानकारी गराउँछु।”

उनले अब राष्ट्र निर्माणको नयाँ यात्रामा राष्ट्रिय स्वतन्त्र पार्टीको माध्यमबाट अघि बढ्ने घोषणा गर्दै रास्वपाको नीति, दृष्टिकोण र संस्कारसँग आफू जोडिएको स्पष्ट पारेका छन्। “समस्याले गिज्याएको देशलाई समाधानको बाटोमा लैजान, निराश राजनीतिभन्दा आशाको राजनीति स्थापित गर्न म रास्वपामा आएको हुँ,” सापकोटाले भनेका छन्।

विगतको सम्बन्धलाई सम्मानका साथ हृदयमा राख्दै उनले भविष्यको यात्रामा पनि साथ, सुझाव र समिक्षाको अपेक्षा राख्ने उल्लेख गरेका छन्। सापकोटाले अन्त्यमा “राजनीति बदल्न सकिँदोरहेछ, यदि नीयत र दृष्टिकोण सही छ भने,” भन्दै जय नेपाल, जय लोकतन्त्र र जय जिम्मेवार नेतृत्वको नारा दिएका छन्।