पल शाहविरुद्ध नाबालिकाले नवलपुर पनि फेरिन बयान

कावासोती । अभिनेता पल शाहविरुद्ध जबरजस्ती करणीको मुद्दा दर्ता गरेकी नाबालिकाले नवलपुर जिल्ला अदालतमा बयान फेरिकी छन् । बुधबार जिल्ला अदालतमा बकपत्र दिदै पीडित भनिएकी नाबालिकाले आफूमाथि बलात्कार नभएको बताएकी छन् ।
२०७७ चैत पहिलो साता नवलपुरको एक होटलमा अभिनेता पल शाहले बलात्कार गरेको भन्दै फागुन नवलपुर प्रहरीमा जाहेरी दिएकी नाबालिकाले बुबाले अन्य व्यक्तिको दवावमा परेर उजुरी दिएको जिकिर गर्दै अभियुक्त शाहले आफुलाई बलात्कार नगरेको बयान दिएकी हुन् ।

शाहले बलात्कार गरेको भनेर आफुले प्रहरीलाई बयान समेत नदिएको उनले दावी गरेकी छन् । उनले बुबालाई उजुरी दिन धम्कि र दवाव आएको समेत बताएकी छन् ।
शाहले आफुलाई बलात्कार गरेको भन्दै उनले तनहुँ र नवलपुरमा जाहेरी दिएकी थिईन् । यस अगाडी तनहुँ जिल्ला अदालतमा बयान फेरेकी उनले बुधबार नवलपुर जिल्ला अदालतमा पनि आफ्नो बयान फेरेकी हुन् ।
बलात्कार भएको भनेको दिन राति आफु् र पल शाहको भेट पनि नभएको तथा आफु घटना भएको भनिएको होटल सञ्चालकको छोरी संग सुतेको बयान नाबालिकाले दिएको नवलपुर जिल्ला अदालतका सूचना अधिकारी लाल बहादुर क्षेत्रीले जानकारी दिनुभयो ।
पीडित नाबालिकाले सरकारी वकिलको रोहवरमा प्रहरीसंग दिएको बयानमा शाहले आफुलाई गितको सुटिङको क्रममा राति बसेको होटलमा बलात्कार गरेको बताएकी थिइन् । बालिकाले बुधबार जिल्ला अदालत र यस अगाडी अभियुक्त शाहले सरकारी वकिलको रोहवरमा प्रहरीलाई दिएको बयान समेत बाझिएको छ ।
शाहले बयानमा बलात्कार भएको भनेको दिन नाबालिका एक्लै भएको कारण आफुले नडराई सुत्न र गुडनाइट भनेर कोठाबाट फर्किएको बताएका थिए । तर नाबालिकाले बकपत्रको क्रममा सो दिन आफुहरुको भेट नभएको र होटल सञ्चालकको छोरी संग सुतेको जिकिर गरेकी छन् ।
पीडित नाबालिकाको बुबाको बिहिबार पुनः बकपत्र हुनेछ । बुबाले समेत तनहुँ जिल्ला अदालतमा दिएको बकपत्रमा आफ्नो बयान फेरि सकेका छन् ।