नवलपुरमा जनावारको संरक्षणका लागि उच्चथली निर्माण

ज्ञानु पंगेनी
कावासोती । वर्षाको समय मा बाढी र डुबानका वेला वन्यजन्तुलाई संरक्षण गर्ने उदेश्यले नवलपुरको देवचुली नगरपालिकामा पर्ने दिव्य मध्यवर्ती सामुदायीक बनमा उच्चस्थली निर्माण गरिएको छ ।
चितवन राष्ट्रिय निकुञ्ज अन्तरगत पर्ने नारायणी नदी आसपास रहेको मध्यवर्ती क्षेत्रमा रहेका विषेश गरि दुर्लभ एक सिंगे गैडासंगै बनमा रहेका हरिण , मृग , जरायो , बदेल , बाग , भालु लगायतका जनावारहरु वर्षामा नारायाणी नदिमा आउने बाढीले नबगाउन र डुबानबाट बच्न सकुन भन्ने उदेश्यले उच्चस्थलीको निर्माण गरिएको उच्चस्थली निर्माण संयोजक नेत्र वहादुर पाण्डेले जाकारी दिए ।
यस मध्यवर्ती क्षेत्रमा १२ वटासम्म गैडा रहेको र सयौको संख्यामा मृगहरु देखिने गरेका छन भने हरिण , भालु र बदेल समेत रहेका छन । नारायणी नदि र बौलाहा खोलाको बिचमा पर्ने भएकाले उच्चस्थली निर्माण गरिएको स्थान वर्षेनी बाढी पस्ने र डुबानमा पर्दछ । डुबानबाट बच्न उच्च स्थान नहुदा वर्षेनी कतिपय जनावार वगेर भारतसम्म पुग्ने र कतिपय जनावारको मृत्यु हुने गरेको छ । डुबानका वेला जनावारहरु उच्चस्थलीमा आएर बस्नेछन र जोगिनेछन भन्ने अपेक्षाले उच्चस्थली निर्माण गरिएको पाण्डेले बताए ।
डब्लु. डब्लु. एफ. को तराई भू–परिधि ( ताल ) कार्यक्रम अन्तरगत संरक्षित तथा मध्यवर्ती क्षेत्रको १० लाख ७२ हजार तथा समुदायको ८० हजार गरी कुल ११ लाख ५२ हजार रुपैयाको लागतमा उचस्थली निर्माण गरिएको हो ।
४० मिटर लम्बाई , २० मिटर चौडाई र दुई मिटर उचाईमा उच्चस्थली निर्माण गरिएको छ । नारायणी नदिबाट ५० मिटरको दुरीमा निर्माण गरिएको छ । उच्चस्थलीमा जंगली जनावार सजिलैसंग चड्न वा झर्न सक्ने गरेर बाटो समेत बनाइएको छ । भविष्यमा नदीमा आउने बाढी र डुबानबाट निकुञ्जभित्र रहेका वन्यजन्तु आफैं सुरक्षित हुने विश्वास लिएकोे छ ।
नेपालमा नै पहिलो पटक वन्यजन्तुको संरक्षणका लागि यस कामको थालनी गरिएकोे पाण्डेको दावी छ ।