समृद्ध नेपाल र सुखी नेपाली कृषि र पर्यटनबाट मात्रै सम्भव छ ; भवानी राणा

उद्योग वाणिज्य संघ बर्दघाट सुस्ता पुर्व जिल्ला संघ गैडाकोटको भवन शिलान्यास तथा जिल्ला संघ घोषणा एवम् चौथो साधारण सभाको आईतवार उद्घाटन कार्यक्रममा बोल्दै राणाले सो कुरा बताएकी हुन ।
नेपालमा उद्योग व्यवसाय संचालन गर्न राष्ट्रिय अन्तराष्ट्रिय उद्योगी व्यवसायीहरु अग्रसर भए पनि उचित वातावरण अझै नभएको उनको जिकिर थियो । उनले भनिन ‘नेपालमा उद्योग संचालन गर्ने थुप्रै सम्भावना छन तर उचित वातावरण छैन । बैङ्कको ब्याजदर दिनप्रतिदिन बढेको बढै छ । उद्योग सुरु गर्दा नौ प्रतिशतको ब्याजदर वर्ष दिनमै १६ प्रतिशत पुग्छ अनि कसरी व्यवसायीहरु अगाडी बढ्न सक्छन ? ’ उनले थपिन ‘ अहिले बित्तिय क्षेत्रमा एककिसिमको ठूलो संकट आईरहेको छ । त्यो तपाई हामि सबैले भोग्न परेको छ । त्यो साना होस् या ठूला व्यापारी होस् । यस्तो अवस्थामा उद्योगहरु कसरी फस्टाउन सक्छन ? ’

यस्तै उनले पछिल्लो समय महिलाहरु पनि उद्योग व्यवसायमा संलग्न भई निजि क्षेत्रको विकास र प्रबद्र्धनमा लागेकाले महिला उद्यमी व्यवसायीका लागि तीनै तहको सरकारले प्राथमिकतामा राखेर निती तथा योजना र बजेट छुट्टाउन समेत उनले माग गरिन ।
उद्योग व्यवसायमा सक्रिय महिलाहरुका लागि सहुलिय संगै सम्मान र कदर गरेर उनीहरुमा हौसला प्रदान गर्न समेत आवश्यक रहेको उनले बताईन ।
सम्बोधनकै क्रममा राणाले जिल्ला संघको भवन निर्माण गर्न एक लाख एक रुपैया रकम व्यक्तिगत रुपमा प्रदान गर्ने समेत प्रतिबद्धता जनाईन । भने महासंघको तर्फबाट समेत पहल गर्ने बताईन ।
गैडाकोट नगरपालिका स्तरीय उद्योग वाणिज्य संघ गैडाकोटलाई स्तर उन्नती गर्दै जिल्ला संघ स्थापना गरिएको छ । आईतवार राणाले जिल्ला संघको घोषणा समेत गरिन ।
गैडाकोट चारको खेलकूद मैदान नजिकै भवन निर्माण गर्न लागिएको छ । भवन निर्माणका लागि स्थानीय समाजसेवि व्यक्तित्वहरुले जग्गा समेत सहयोग गरेका छन ।
यस्तै कार्यक्रममा गैडाकोट क्षेत्रका ६ जना उत्कृष्ट उद्योगी व्यवसायीहरुलाई सम्मान समेत गरिएको थियो । दोसल्ला र सम्मानपत्रले उनीहरुलाई सम्मान गरिएको हो ।

अमृत भट्टचनको अध्यक्षतामा भएको कार्यक्रममा प्रदेश सासंद विष्णु लामिछाने , ओमकला गौतम , जिल्ला प्रशाशन कार्यालय नवलपुरका प्रमुख दिपकराज नेपाल , जिल्ला प्रहरी कार्यालय नवलपुरका प्रमुख रमेश थापा , देवचुली नगरपालिका प्रमुख पूर्ण कुमार श्रेष्ठ , मध्यविन्दु नगरपालिका प्रमुख चन्द्र वहादुर राना , बौदीकाली गाउपालिका प्रमुख दूर्गा वहादुर राना लगायतका अतिथीहरुको सहभागिता रहेको थियो ।