चिया पसलको गफले खुल्यो शहीद स्मृतिमा नेविसंघले लगाएको ताला

कावासोती । पूर्वी नवलपरासीको कावासोती ३ मा रहेको शहीद स्मृति सामुदायिक माध्यमिक विद्यालयमा लगाएको ताला सोमबार खुलेको छ । नेपाली कांग्रेस निकट विद्यार्थी संगठन नेपाल विद्यार्थी संघ नवलपुरले गत पुस ६ गते विभिन्न ५ बुँदे  माग राख्दै लगाएको ताला सोमबार खुलेको हो । कावासोती नगरपालिका, विद्यालय प्रशासन र विद्यार्थी संगठनहरु बिच पटक–पटक बसेको बैठकबाट निष्कर्ष नआएको कारण विद्यालयमा १७ दिन सम्म ताला बन्दी भएको थियो । तर गत आईतबार बिहान कावासोती –२ मा रहेको भण्डारी चिया पसलमा कावासोती नगरपालिका प्रमुख बिष्णु प्रसाद भुषाल, नगरपालिकाको कानुनी सल्लाहाकार एवम् पूर्व न्यायाधिस ऋषि प्रसाद अधिकारी, नेपाली कांग्रेस नवलपुर जिल्ला सचिव महेन्द्र पोखरेल र नगर सभापती शालिकराम ढकाल बिच भएको चिया गफले विद्यालयको ताला खुल्ने सहमती भएको स्रोतले जनाएको छ ।

चिया गफमा नगर प्रमुख भुषाल र सल्लाहाकार अधिकारीले विद्यालयमा लगाएको ताला खोलेर विद्यालय सहजरुपमा सञ्चालन गर्ने वातावरण बनाउन भनेका थिए । उनिहरुले विद्यालयमा देखिएको समस्याको बिषयमा विभिन्न तरिकाले अनुषन्धान गर्न सकिने भन्दै सोही गफमा ताला खोल्न नेविसंघलाई भन्दिनु भनेका थिए । सोही क्रममा विद्यालयलाई राजनीति गर्ने स्थल नबनाउन नगरपालिकाको कानुनी सल्लाहाकार एवम् पूर्व न्यायाधिस ऋषि प्रसाद अधिकारीले अनुरोध गरेका थिए । चिया गफमा विद्यालय जस्तो संस्थामा ताला लगाउने बिषय गलत भएको र विद्यालयमा अनियमितता भएको आरोपका बिषयमा फरक तरिकाले अनुषन्धान गर्न सकिने भन्दै ताला खोल्न नेविसंघलाई अनुरोध गर्ने बिषयमा नेपाली कांग्रेस नवलपुर सचिव पोखरेल र नगर सभापती ढकाल सहमत भएका थिए । सोही अनुसार नेपाली कांग्रेस नवलपुर सचिव महेन्द्र पोखरेलले विद्यालयमा ताला खोल्न नेविसंघका नेतालाई निर्देशन दिएको बुझिएको छ । नेता पोखरेलको निर्देशन अनुसार नै आईतबार दिउसो नगरपालिकामा भएको बैठकबाट ताला खोल्ने सहमती जुटेको थियो ।

बैठकमा ताला खोली नगरपालिकाको गठित छानविन तथा प्रतिवेदन कार्यदललाई छानविन गर्न सहयोग गर्ने सहमती भएको थियो । सहमती अनुसार सोमबार बिद्यालयमा लगाएको ताला खोलिएको थियो । नेविसंघले लेखापाल निलम्बन सहित विद्यालयमा आर्थिक अनियमितता भएको आरोप लगाउदै ताला लगाएको थियो ।