बाँकेको बाख्रा अनुसन्धान इकाईमा आगलागी हुँदा ६२ वटा बाख्रा मरे

रूपन्देही । बाँकेको खजुरामा रहेको कृषि अनुसन्धान निर्देशनालय, लुम्बिनी प्रदेशको बाख्रा अनुसन्धान इकाईमा आगलागी हुँदा ६२ वटा बाख्रा आगोमा जलेर मरेका छन्।

गयराती आगलागी हुँदा इकाईमा रहेका मध्ये ६२ वटा बाख्रा मरेका हुन् । विद्युत सर्ट भएर बाख्रा अनुसन्धान इकाईमा आगलागी भएको आशंका गरिएको छ । बाख्रा अनुसन्धान इकाईको खोर नम्बर १ मा ८३ वटा बाख्रा रहेकामध्ये २८ वटा ठूला र ३४ वटा पाठापाठी मरेको बाँके प्रहरीले जनाएको छ । २१ वटा बाख्रालाई उद्धार गरिएको बाँके प्रहरी प्रवक्ता डीएसपी नारायण डाँगीले बताए ।

प्रहरीका अनुसार स्थानीयवासी र त्यहाँका कर्मचारीले बिहान ६ बजे आगो निभाएका थिए । जिउँदा बाख्राको उद्दार समेत स्थानीय र कर्मचारीहरुले गरेका थिए । घटनाको बारेमा अनुसन्धान भइरहेको डीएसपी नारायण डाँगीले बताए ।