नवलपुर एफएमको आयोजनामा टोपी दिवसको अवसरमा शुभकामना आदानप्रदान

नवलपुर । नवलपुर एफएमको आयोजनामा आज नवलपुर एफ एमको प्राङ्गणमा राष्ट्रिय टोपी दिवसको अवसरमा शुभकामना आदानप्रदान कार्यक्रम गरी मनाइएको छ ।

शुभकामना आदानप्रदान कार्यक्रममा कावासोतीका जनप्रतिनिधि, राजनीतिक दलका प्रतिनिधि, विभिन्न संघसंस्थाका प्रतिनिधिहरु, पत्रकार लगायतको सहभागिता रहेको थियो । कार्यक्रम कावासोती नगरपालिकाका नगर प्रमुख आतिथ्यतामा भएको थियो ।

कार्यक्रममा विषय प्रवेश गराउँदै स्व. पत्रकार तिर्थराज स्मृति ट्रष्टका अध्यक्ष एवम् त्रिवेणी गजेन्द्र मोक्ष धामका कार्यकार्य निर्देशक झपेन्द्रश्वर भुसालले टापीको धार्मिक, सांस्कृतिक र वैज्ञानिक सबै हिसावले महत्वपूर्ण रहेको र नेपालीहरुको लागि टोपीको आफ्नै मौलिक पहिचान रहेको बताउनुभयो ।

कार्यक्रममा कावासोती नगरपालिकाका नगर प्रमुख विष्णु भुसालले नवलपुर एफएमका संस्थापक स्व। तिर्थराज भुसालको मृत्यु रहस्यमय रहेको र प्रहरीले यस्ता घटनालाई यथार्थ छानविन गरेर परिवारलाई न्याय दिन नसकेको बताउनुभयो ।

कार्यक्रममा कावासोती ३ का वडाध्यक्ष डोरमान गिरी, पत्रकारहरुको तर्फबाट नेपाल पत्रकार महासंघ गण्डकी प्रदेशका सचिव भविश्वर पाण्डे, राजनीतिक दलहरुको तर्फबाट नेकपा माले नवलपुरका सचिव लोकनाथ काफ्ले, शैक्षिक व्यक्तित्वहरुको तर्फबाट केशव कंडेल, संघसंस्थाहरुको तर्फबाट जिल्ला खानेपानी महासंघ नवलपुरका अध्यक्ष खिमानन्द भुसाल, महिलाहरुको तर्फबाट सरस्वती तिमिल्सिना लगायतले शुभकामना मन्तव्य राख्नु भएको थियो ।

नवलपुर एफ. एम.का अध्यक्ष नारायण शर्माको अध्यक्षतामा भएको कार्यक्रममा नवलपुर एफ. एमका प्रबन्ध निर्देशक राधिका भुसालले स्वागत मन्तव्य राख्नुभएको थियो ।