बाल अधिकार र बालमैत्री स्थानीय शासनसम्बन्धी अभिमुखीकरण कार्यक्रम सम्पन्न

चोरमारा ।  मध्यविन्दु नगरपालिका वडा नम्बर ४ का बाल क्लब संजालका पदाधिकारीलाई बाल अधिकार, किशोरी अधिकार र बालमैत्री स्थानीय शासनसम्बन्धी वडास्तरीय अभिमुखीकरण कार्यक्रम सम्पन्न भएको छ।
जागृति बाल तथा युवा सरोकार नेपालको आयोजनामा क्यान्नलानको सहयोगमा मध्यबिन्दुमा संचालित किशोरी सशक्तीकरण कार्यक्रम अन्तर्गत वडा स्तरीय बाल संजालका पदाधिकारीहरुलाई तालिम सन्चालन गरिएको कार्यक्रम अधिकृत राधा बोटेले बताउनुभयो ।
कार्यक्रममा राधा बोटेले बालबालिका भनेको को हो? बाल अधिकारको उत्पत्ति र उद्देश्यहरु बाल अधिकारका चार स्तम्भ बाच्न पाउने, विकास, संरक्षण, सहभागिताको अधिकार, बाल क्लबको भूमिका र जिम्मेवारीको साथमा बालमैत्री स्थानीय शासनको अवधारणा र यसको सुचकको बारेमा सहजीकरण गर्नुभएको थियो ।
जिल्ला प्रहरी कार्यालय नवलपुरकी महिला, बालबालिका तथा जेष्ठ नागरिक सेवा प्रमुख विन्दु वि.क. ले बालबालिकामाथि हुने हिंसा र दुर्व्यवहार, लागू पदार्थको असर, बाल विवाहको चुनौती, र ‘राम्रो र नराम्रो छुवाइ’ को बारे स्पष्ट र सशक्त जानकारी दिनुभयो।
उहाँले हिंसाका घटना भएमा सहयोग लिन सकिने निकायहरू, जस्तै १०९८ बाल हेल्पलाइन, १०० प्रहरी कन्ट्याक्ट लगायत महत्वपूर्ण सम्पर्क सूत्रहरूबारे समेत जानकारी गराउनुभयो ।
विश्वभर बालबालिकाका अधिकार सुनिश्चित गर्न सन् १९८९ मा संयुक्त राष्ट्रसंघले बाल अधिकारसम्बन्धी महासन्धि (CRC) पारित गरेको थियो, जसमा नेपाल सन् १९९० मा हस्ताक्षरकर्ता राष्ट्रका रूपमा आबद्ध भएको हो ।
नेपालमा संविधान, कानुन र नीतिहरू मार्फत बालबालिकाका अधिकार सुनिश्चित गरिँदै आएको छ। नेपालको संविधान २०७२ ले बालबालिकाको जीवन, विकास, संरक्षण र सहभागिता जस्ता चार प्रमुख अधिकारलाई मौलिक हकका रूपमा सुनिश्चित गरेको छ ।
प्रमुख अतिथि वडाध्यक्ष डिल्लीराम थारुले बालबालिकाको उज्वल भविष्य निर्माण उनीहरूकै हातमा रहेको उल्लेख गर्दै, शिक्षामा निरन्तरता, जिम्मेवारी र अनुशासनमा ध्यान दिनुपर्नेमा जोड दिनुभयो। बाल विवाहले भविष्यमा ल्याउने कानुनी झन्झट र अवसर गुमाउने जोखिमबारे समेत उहाँले सचेत गराउनुभयो।
सभाध्यक्ष सिउराज चौधरीले यस्ता कार्यक्रमले बालबालिकाको ज्ञान, क्षमता र आत्मविश्वास अभिवृद्धिमा सहयोग पुर्‍याउने विश्वास व्यक्त गर्दै, सिकेका कुराहरू अरू साथीहरूसँग पनि बाँड्न आग्रह गर्नुभयो।
कार्यक्रम मध्यविन्दु वडा नं. ४ र जिल्ला प्रहरी कार्यालय नवलपरासी (बर्दघाट सुस्ता पूर्व) को समन्वयमा आयोजित गरिएको थियो ।
कार्यक्रमको अध्यक्षता वडा नं. ४ बाल क्लबका उपाध्यक्ष सिउराज चौधरी, प्रमुख अतिथि वडा अध्यक्ष डिल्लीराम थारु रहनुभयको कार्यक्रम स्थानीय आधारभूत स्वास्थ्य सेवा केन्द्रको सभाहलमा बाल क्लबका पदाधिकारी, बालबालिका, शिक्षक तथा सरोकारवालाहरु गरी ४४ जना सहभागी थिए।