नवलपुर–१ मा शशांकको ‘इनिङ’ समाप्त, १८ वर्षपछि स्थानीय गजेन्द्र आलेलाई टिकट

नवलपुर ।नेपाली कांग्रेसले आगामी फागुन २१ गते हुने प्रतिनिधिसभा सदस्य निर्वाचनका लागि नवलपुर क्षेत्र नम्बर १ मा गजेन्द्र आले मगरलाई उम्मेदवार बनाएको छ । पार्टीले यसपटक ‘हेविवेट’ नेता एवं पूर्वमहामन्त्री डा. शशांक कोइरालाको सट्टा स्थानीय नेता आलेलाई टिकट दिएको हो ।

२०४८ सालदेखि निरन्तर कांग्रेसले जित्दै आएको यो क्षेत्रलाई कांग्रेसको ‘गढ’ मानिन्छ । २०६४ सालको संविधानसभा निर्वाचनदेखि यहाँबाट लगातार शशांक कोइरालाले जित्दै आएका थिए । यसपटक भने पार्टीले १८ वर्षपछि स्थानीय उम्मेदवारलाई अघि सारेको छ ।

को हुन् गजेन्द्र आले ?

गैँडाकोट नगरपालिका–१२ का स्थायी बासिन्दा आले नेपाली कांग्रेसका महासमिति सदस्य हुन् । उनी यसअघि २०७४ सालको स्थानीय तह निर्वाचनमा गैँडाकोट नगरपालिकाको मेयर पदमा थोरै मतान्तरले पराजित भएका थिए ।

आदिवासी जनजाति समुदायमाझ लोकप्रिय मानिने आले पार्टी संगठन विस्तार र स्थानीय मुद्दामा सक्रिय रहँदै आएका छन् । आफ्नो प्रारम्भिक राजनीतिक यात्रामा बिपी कोइरालाको संगत पाएका आलेले स्थानीय स्तरमा भिजेको नेताको छवि बनाएका छन् । पार्टीभित्र बढेको रूपान्तरणको दबाब र स्थानीयलाई प्राथमिकता दिने नीतिका कारण कोइरालाको विकल्पमा आलेलाई रोजिएको विश्लेषण गरिएको छ ।