नवलपुर–२ मा तिलक महतको पक्षमा एमालेको तीव्र घरदैलो अभियान

नवलपुर। फागुन २१ गते हुने प्रतिनिधिसभा निर्वाचनलाई लक्षित गर्दै नेपाल कम्युनिस्ट पार्टी ९एमाले० ले नवलपुर–२ का चालिसै वडामा प्रचार अभियान तीव्र बनाएको छ। निर्वाचन आयोगले औपचारिक रूपमा प्रचार अवधि सुरु गरेसँगै पार्टीका नेता–कार्यकर्ता गाउँ–टोलमा केन्द्रित हुँदै घरदैलो कार्यक्रमलाई व्यापक बनाइरहेका छन्।

एमालेका तर्फबाट नवलपुर–२ का प्रतिनिधिसभा सदस्यका उम्मेदवार तिलक महतलाई इमानदार, विकासप्रेमी र सबै वर्ग–समुदायको साझा प्रतिनिधित्व गर्न सक्ने सक्षम नेताका रूपमा प्रस्तुत गर्दै मतदातासम्म सन्देश पुर्‍याउने काम भइरहेको छ। विगतमा निर्वाह गरेको जिम्मेवारी, सार्वजनिक जीवनमा कायम असल छवि तथा जनतासँगको निरन्तर सम्पर्कलाई आधार बनाउँदै महतलाई विजयी गराउन कार्यकर्ता पंक्ति सक्रिय बनेको पार्टी स्रोतले जनाएको छ।

घरदैलो भेटघाटका क्रममा उम्मेदवार महत स्वयं मतदातासँग प्रत्यक्ष संवादमा जुटेका छन्। नवलपुरको दीर्घकालीन विकासका लागि स्पष्ट खाका कोर्न सक्ने, सदनमा जिल्लाका आवाज बुलन्द गर्न सक्ने र जनजीविकासँग जोडिएका जटिल कानुनी तथा नीतिगत अड्चन समाधानका लागि पहल गर्न सक्ने नेताका रूपमा मतदाताको रोजाईमा तिलक महत पर्नु भएको छ ।

स्थानीय मतदाताहरूले समेत सुझबुझपूर्ण र परिपक्व नेतृत्वको आवश्यकता औंल्याउँदै तिलक महतलाई सक्षम विकल्पका रूपमा लिएको प्रतिक्रिया दिएका छन्। “आवेग र उत्तेजनाभन्दा माथि उठेर हेर्ने हो भने अहिले नवलपुर–२ का लागि सबैलाई समेट्न सक्ने उम्मेदवार तिलक महत नै हुनुहुन्छ,” एक मतदाताले भने, “हाम्रो साथ र शुभकामना उहाँलाई छ।”

चुनावी माहोल क्रमशः तातिँदै जाँदा नवलपुर–२ मा विकास, स्थायित्व र प्रभावकारी प्रतिनिधित्वको एजेन्डा केन्द्रमा राखेर प्रचार अभियान अघि बढाइएको एमालेले जनाएको छ।