हावाहुरीले नवलपरासीमा सयौं विगाहाको केराखेतीमा क्षति

नवलपरासी । पश्चिम नवलपरासीको सुस्ता गाउपालिकामा हावा हुरीका कारण ६ सय विगाहा भन्दा बढी खेतमा गरीएको केराखेतीमा क्षति भएको छ । आईतबार सांझ आएको हावा हुरीले ६ सय विगाहा भन्दा बढी खेमा रहेको केराका बोटहरु कामनै नलाग्नेगरी भांचिदिएको छ ।

सुस्ता गाउपालिकाको पक्लीहवा र नर्सहि क्षेत्रका किसानहरु केरा खेती गर्दै आईरहेका छन् । उखु खेती गर्दा मिल संचालकले समयमै भुक्तानी नदिने समस्या बढेपछि उनीहरु पछिल्ला बर्षहरुमा केरा खेती तर्फ आकर्षित हुदै आएका थिए । हिजो आज किसानका खेतमा लगाईएका केरामा लामा लामा घरी देख्न सकिन्छ । भर्खरै पसाएका र पसाउदै गरेका केराहरु हुरीले भांचिदिएपछि किसानहरु चिन्तित बनेका छन् । उखु लगाउदा पैसा नपाएर केरा खेती गर्न थालेका किसानहरुलाई प्रकृतिले समेत ठगेको र किसानहरुका लागि सरकारले कुनै चासोनै नदिएको सूता ४ नर्सहिका केरा किसान अलहम मियाले बताए ।

गत बर्ष पनि पश्मि नवलपरासीका केरा किसानहरु हावा हुरीले केरा ढलाईदिएपछि मर्कामा परेका थिए । किसानहरु क्षतिको विवरण संकलन गरेर सम्बन्धीत निकायमा बुझाउनेगरे पनि अहिले सम्म क्षतिपुर्ति पाउन नसकेको बताएका छन् । औपचारिकताका लागि क्षतिको विवरण संकलन गरी निकायहरुमा पेस गरे पनि क्षतिपुर्ति पाउने आस भने आफुरुमा नरहेको केरा उत्पादक कृषक संघ नवलपरासीका अध्यक्ष लख्खु यादवले बताए । विमा कम्पनीले केरा खेतीको विमा गर्न नमानेका कारण किसानहरुले ठुलो क्षति बेहोर्नुपरेको यादवको भनाई छ ।

सुस्ता गाउपालिकाले किसानहरुको क्षतिको विवरण संकलन गरिरहेको छ । पुर्ण विवरण संकलन भएपछि गाउपालिकाले सकेकोक्षतिपुर्ति उपलब्ध गराउने र सम्बन्धीत निकायमा क्षतिपुर्ति माग गर्ने गाउपालिका अध्यक्ष राम प्रसाद पाण्डेले बताए । पाण्डेले केरा किसानहरुको लागि विमा रकम अनुदान अन्तरगत गाउपालिकाले २० लाख रकम विनियोजन गरेकोमा विमा कम्पनि र सरकार विच केहि कुराहरु बाझिएका कारण विमा गर्न नसकिएको बताए ।
हावा हुरीका कारण सुस्ता गाउपालिकाको वडा नमबर १,२ र ३ मा घरका छानाहरु उडाएको र पर्खालहरु समेत ढलाएको बताईएको छ । वडा नम्बर ४ र ५ मा केरा खेतीमा ठुलो क्षति पुगेको अध्यक्ष पाण्डेले बताएका छन् ।