काठमाडौं– प्रमुख प्रतिपक्षी नेपाली काँग्रेसको जारी केन्द्रीय कार्यसमिति बैठकमा हिन्दु धर्मको विषयले प्रवेश पाएको छ ।

गत मङ्सिर १३ गतेदेखि जारी केन्द्रीय समिति बैठकमा हिन्दु धर्मबारे केही नेताहरूले दिँदै आएको अभिव्यक्तिलाई लिएर केन्द्रीय सदस्य मानबहादुर विश्वकर्माले पार्टीको आधिकारिक धारणा बनाउन माग गरेका हुन् ।
सङ्घीय संरचनाअनुसार परिमार्जित गर्न बनेको विधान संशोधनको प्रस्तावमाथि छलफल गर्न आयोजित बैठकमा नेता विश्वकर्माले हिन्दु धर्मको विषयबारे प्रष्ट पार्न माग गरेका हुन् ।

बुधबारको बैठकमा आफ्नो धारणा राख्दै केन्द्रीय सदस्य विश्वकर्माले पार्टीको विधान र संविधान विपरीत जिम्मेवार नेताहरूबाटै हिन्दु राष्ट्रका पक्षमा आएको अभिव्यक्तिको चर्को विरोध गरेका हुन् ।

‘आउँदा दिनमा राजनीतिक स्थिरता भएपछि धर्मनिरपेक्षता राख्ने कि हिन्दु धर्म भनेर जनमत सङ्ग्रह हुनुपर्छ’, भनी महामन्त्री शशांक कोइरालाले दिएको सार्वजनिक अभिव्यक्ति किन आयो भन्दै प्रश्न गरेका थिए ।
‘महामन्त्रीज्यूले पार्टी नीतिविपरीत समावेशी सिद्धान्त र धर्मका विषयमा अभिव्यक्ति दिँदै हिँड्नुभएको छ । यो कसरी भयो ? पार्टी नेतृत्वको ध्यानाकर्षण गराउन चाहान्छु’, बैठकमा विश्वकर्माले भनेको भनाइ उद्धृत गर्दै स्रोतले भन्यो, ‘महामन्त्रीले हिन्दुत्वको वकालत गरेसँगै राजतन्त्रको विषयमा पनि सोच्नुपर्छ भन्नेजस्ता विवादास्पद अभिव्यक्ति दिने गर्नुभएको छ ।  यसको निक्र्योल हुन जरुरी छ ।’

महामन्त्री कोइरालाप्रति इङ्गित गर्दै  विश्वकर्माले भने, ‘पार्टीकै नेतृत्वमा समावेशी संविधान निर्माण भएको हो । आरक्षणको विरोधमा किन बोल्नुहुन्छ ? महामन्त्री राजतन्त्रको विषयमा समेत सोच्नुपर्छ भन्न थाल्नुभएको छ । यो के भनेको हो ? गणतन्त्र ल्याउन पार्टीले गरेको त्यत्रो बलिदान र योगदान कुल्चेर त्यसरी बोल्न पाउनुहुन्छ ?’

मङ्सिर पहिलो साता काठमाडौँमा भएको एक कार्यक्रममा महामन्त्री कोइरालाले हिन्दु राष्ट्र र धर्म निरपेक्षबारे जनमत सङ्ग्रह गर्न सकिने अभिव्यक्ति दिएका थिए ।

उनको यो अभिव्यक्तिप्रति काँग्रेसका धेरै नेता कार्यकर्ता नै अचम्मित बनेका थिए । कतिपय नेताहरूले महामन्त्री कोइरालाको यस्तो अभिव्यक्तिलाई निजी विचार भने पनि कतिपयले पार्टीको महामन्त्रीजस्तो पदमा रहेका नेताले सार्वजनिक रूपमा बोलेको विषय निजी विचार हुन नसक्ने भन्दै आपत्ति जनाउँदै आएका थिए । तर पार्टीको आधिकारिक फोरम या बैठकमा यो विषयले प्रवेश पाउन सकेको थिएन ।

काँग्रेस स्रोतका अनुसार कोइरालाको यस्तो अभिव्यक्तिप्रति अन्य केन्द्रीय सदस्यहरू समेत आक्रोशित बने पनि उनीहरूले बैठकमा भने यो विषय उठाएका थिएनन् ।

केन्द्रीय सदस्य धनराज गुरुङले रातोपाटीसँगको कुराकानीमा महामन्त्री कोइरालाले पार्टी नीति तथा संविधानविपरीत बोल्ने गरेको बताए ।

‘मुलुकलाई धर्मनिरपेक्ष घोषणा गर्न सबैभन्दा बढी आन्दोलन गर्ने जनजाति हुन् । अहिले आएर पार्टी विधानमै नभएका विषय जिम्मेवार नेताहरूले बोल्न थाल्नु दुर्भाग्य हो । यसले काँग्रेसमा रहेका जनजाति नेता कार्यकर्ताको भावनामा ठेस पुगेको छ’, गुरुङले भने ।ratopati.com

नेपाली काँग्रेस : सरकारलाई धर्मनिरपेक्षताको ‘पाठ’ पढाउने तर आफै हिन्दुत्वको वकालत गर्ने ?