हुप्सेकोटमा प्रहरी चौकी स्थापना

ज्ञानु पंगेनी
कावासोती । पूर्बि नवलपरासी (नवलपुर)को हुप्सेकोट गाउपालिकामा प्रहरी चौकी स्थापना गरिएको छ । हुप्सेकोट गाउपालिका वडा नम्बर ४ झ्यालबासमा साविकका देउराली गाविसको भवनमा प्रहरी चौकी स्थपना गरिएको जिल्ला प्रहरी कार्यालय नवलपरासी पूर्वका प्रहरी नायव उपरिक्षक मोहन बहादुर खाँणले जानकारी दिए ।
हुप्सेकोट गाउपालिका अधिकाशं पहाडी क्षेत्रमा पर्दछ । यस अघि हुप्सेकाट गाउपालिका वडा नम्बर ४ मा अस्थाई प्रहरी चौकी शङखदेब र वडा नम्बर ५ को धौवादीमा ईलाका प्रहरी कार्यालय रुद्रपुर रहेको थियो । उक्त प्रहरी कार्यालयले सोहि क्षेत्रको सुरक्षा हेर्दै आएका थिए । अहिले गाउपालिकाको कार्यालय भएको झ्यालबास आसपासको क्षेत्रलाई लक्षित गरि प्रहरी चौकी स्थापना गरिएको हो । गाउपालिका आसपासमा विभिन्न समयमा आपराधिक कृयाकलाप हुदै आएकाले त्यस्ता कृयाकलापको नियन्त्रण गरि गाउको शान्ति सुव्यवस्था कायम गर्नका लागि चौकीको स्थापना गरिएको गाउपालिका अध्यक्ष लक्ष्मी पाण्डेले बताईन् ।
गाउपालिकामा जनसंख्याको दर समेत बृद्धि हुदै गएको तथा कतिपय बेला तुरुन्त प्रहरी अउनुपर्ने भए पनि जिल्ला प्रहरी कार्यालयबाट समयमा पुग्न नसक्दा अप्रिय घटना हुने गरेकाले चौकी नभै नहुने अवस्था रहेको अध्यक्ष पाण्डेले बताईन् । यहाँका स्थानीयले समेत गाउपालिका स्थापना भएदेखि नै प्रहरी चौकीको माग गर्दै आएका थिए । स्थानीयको मागलाई सम्बन्धित निकाय समक्ष पहिलेदेखि नै राखेकाले अहिले चौकी स्थापना गर्न सफल भएको अध्यक्ष पाण्डेले बताईन् ।
गत वर्ष २०७६ असोज ७ गतेको नेपाल सरकार (मन्त्रिपरिषद) को बैठकले हुप्सेकोट गाउपालिकामा प्रहरी चौकी स्थापना गर्ने निर्णय गरि दरवन्दी कामय गरेको थियो । जनशक्ति अभावमा केन्द्रबाट प्रहरी नपठाएको र अहिले प्रहरी पठाएकाले ढिलो गरि चौकी स्थापना भएको जिल्ला प्रहरी कार्यालय नवलपरासी पूर्वका प्रमुख दिपक रेग्मीले जानकारी दिए । प्रहरी सहायक निरिक्षक शिवराम केसीको कमाण्डमा अहिले यहाँ प्रहरी खटाइएको छ ।
हुप्सेकोट गाउपालिका अध्यक्ष लक्ष्मी पाण्डे, जिल्ला प्रहरी कार्यालय नवलपरासी (पूर्व) का प्रहरी प्रमुख प्रहरी उपरिक्षक दिपक रेग्मी, गाापालिकाका प्रमुख प्रशासकिय अधिकृत कृष्ण सापकोटा, हुप्सेकोट गाउपालिकाको वडा अध्यक्षहरु तथा स्थानीयको सहभागितामा प्रहरी चौकी स्थापना गरिएको हो ।