‘एक्सन’मा नवलपुर प्रहरी : पक्राउ पर्न थाले चोरी गर्ने ट्याक्टर

कावासोती । अवैद्य रुपमा चोरी निकासी गरिरहेका १० वटा ट्याक्टर प्रहरीले नियन्त्रणमा लिएको छ । गत बिहिबार र शुक्रबार दुई दिनमा १० वटा ट्याक्टर प्रहरीले नियन्त्रणमा लिएको जिल्ला प्रहरी कार्यालय नवलपरासी पूर्वका सुचना अधिकारी प्रहरी नायव उपरीक्षक मोहनबहादुर खाँणले जानकारी दिनुभयो । कावासोती नगरपाकिलाको केरुङ्गे खोलाबाट अवैद्य रुपमा चोरी निकासी गर्दै गर्दा शुक्रबार लु ४ त २४४० , प्र. २ ०३००१ त १२७६ , लु ३ त ८५७१,लु ३ त ९७८६ र लु ४ त ७६९ नम्बरको ट्याक्टर नियन्त्रणमा लिएको प्रहरी नायव उपरीक्षक खाँणले बताउनुभयो ।
यस्तै बिहिबार ना ५ त ४२०२ , लु ३ त ८७९२ , ना ४ त ५१२६ , ना २ त ४२४५ नम्बरको ट्याक्टर नियन्त्रणमा लिएको खाँणले बताउनुभयो । नियन्त्रणमा लिएका ट्याक्टरलाई आवश्यक कारवाहिका लागि प्रकृया अगाडी बढाएको प्रहरीले जनाएको छ । जिल्लाका खोलाहरुबाट दिनहुँजसो अवैद्य निकासी भएको स्थानीयबाट गुनासो आउने गरेपनि प्रहरी प्रशासनले आवश्यक कारवाहि गर्न नखोजेको स्थानीयको आरोप छ । यहाँकै केहि जनप्रतिनिधी नै खोलाको अवैद्य निकासीमा संलग्न भएको आरोप स्थानीयको छ । एक हप्ता अघि कावासोती नगरपालिका वडा नम्बर एकमा अवैद्य निकासी गर्दागर्दै पाँच वटा ट्याक्टर प्रहरीले समातेको थियो । तर, वडा नम्बर एकका वडा अध्यक्ष नारायण पन्तको रोहबरमा ती ट्याक्टरलाई प्रहरी कार्यालयमा ल्याउन नदिई घटना ढाकछोप गर्न खोजेको नाम नबताउने शर्तमा एक जना स्थानीयले जानकारी दिनुभयो । प्रहरी नायव उपरीक्षक खाँणका अनुसार ट्याक्टरलाई कारवाहि गर्नका लागि वडा अध्यक्षसंग यस विषयमा कुरा गर्दा आनाकानी गर्दै आएको बताउनुभयो । जिल्ला समन्वय समिति, प्रहरी कार्यालय र नगरपालिकाले निरन्तर ताकेता गरेपछि बिहिबार मात्रै अवैद्य सामाग्री जफत गरि जरिवाना गरेर ट्याक्टर छाडिएको हो । यहाँका केहिनाम चलेका ठेकेदार र जनप्रतिनिधीहरु नै अवैद्य चोरीमा संलग्न हुँदा नियन्त्रण हुन नसकेको स्थानीय बताउछन् ।
अहिले कोरोना संक्रमणका कारण भएको बन्दाबन्दी र निषेधाज्ञाको मौका छोपेर जिल्लाका खोलाहरुबाट रातारात र दिनदहाडै ढुङगा , गिट्टी वालुवा चोरी निकासी हुँदै आएको छ । खोलामा भइरहेको अवैद्य निकासीलाई रोक्न समय समयमा अनुगमन गर्ने , चोरी निकासी रोक्न स्थानीयलाई समन्वय गरि निगरानी गर्न परिचालन गर्ने काम गर्दागर्दै पनि रोक्न नसकिएको कावासोती नगरपालिका प्रमुख चन्द्र कुमारी पुनले बताउनुभयो । राजश्वको प्रमुख श्रोतका रुपमा रहेका खोलानालाको दोहन रोक्नै पर्ने नभए, राजश्व घाटा लाग्ने , जथाभावि खोला दोहन गर्दा धार परिवर्तन गरि बस्तिमा पसेर नोक्सान पु¥याउने हुँदा नगरपालिकाले नियन्त्रणका लागि पहल गरिरहेको पुनको भनाई छ । विभिन्न विकास निर्माणका बाहानामा चोरी निकासी गर्नेक्रम बढेकाले त्यसलाई नियन्ण गर्न नगरपालिकाले निगरानी बढाएको नगर प्रमुख पुनले बताउनुभयो ।
अहिले खोलामा ठेक्का नलागेको अवस्थामा पनि नवलपुरको विनयी , अरुणखोला , गिरुवारी खोला , पथ्थरे खोला , केरुङ्गे लगायतका खोलाहरुमा दिनहुँजसो अवैद्य निकासी भईरहेको छ । अवैद्य निकासी गर्ने सवारीलाई नियन्त्रणमा लिने र जरीवाना मात्रै तिराएर छाड्ने गर्दा निकासी नरोकिएको यहाँका स्थानीयको आरोप छ । कतिपय अवस्थामा प्रहरी प्रशासन कै मिलेमतोमा समेत निकासी हुने गरेको स्थानीयले आरोप लगाउदै आएका छन् ।अवैद्य निकासी गर्ने सवारी र संलग्नलाई कडा खालको सजाय नहुँदासम्म अवैद्य निकासी नरोकिने भएकाले जरीवाना मात्रै तिराएर छाड्ने काम अन्त्य गर्नुपर्ने यहाँका सरोकारवालाहरुको माग समेत रहेको छ । अहिले एउटा ट्याक्टरलाई १५ हजार जरिवाना तिराएर छाड्ने गरिएको छ ।