नवलपुरमा सिआईडि प्रहरी भन्दै ठगी गर्ने एक जना पक्राउ

गंगा विश्वकर्मा
चोरमारा । जिल्ला प्रहरी कार्यालय नवलपरासी (बर्दघाट सुस्ता पूर्व) ले आफु सादा पोशाकको प्रहरी हुँ भन्दै ठगी गर्ने एक जनालाई नियन्त्रणमा लिएको छ । जिल्लाको गैंडाकोट क्षेत्रमा आफु सादा पोशाकको प्रहरी हुँ भन्दै ठगी तथा लुटपाट गर्ने गैंडाकोट–१० का २८ वर्षीय रामचन्द्र परियारलाई प्रहरीले पक्राउ गरेको हो ।
गैडाकोट–९ थुम्सी लगायतका सार्वजनिक स्थान एवं पार्कहरुमा घुम्न आउने युवा युवतीहरुलाई म सादा पोशाकमा हिड्ने सिआईडि प्रहरी हुँ भनि डर त्रास देखाई धाकधम्की दिई साथमा रहेको मोबाईल तथा नगद समेत लुटपाट गरेको भन्ने सुचनाको आधारमा प्रहरीले मंगलबार परियारलाई पक्राउ गरेको हो । परियारले राजमार्ग क्षेत्रमा रहेका होटल भट्टी पसलहरुमा मादक पदार्थ सेवन गरी पैसा समेत नतिरी हिड्ने गरेको पाइएको जिल्ला प्रहरी कार्यालय नवलपरासी (बर्दघाट सुस्ता पूर्व)का डिएसपी मोहन बहादुर खाँणले बताउनु भयो ।
परियारले थुम्सीमा चितवन जिल्ला भरतपुर महा–नगरपालिका वडा नं– ५ रामबागकी १८ वर्षीया बिनिता परियारको साथमा रहेको मोबाईल तथा नगद लुट्न लागेको अवस्थामा प्रहरीले नियन्त्रणमा लिएको खाँणले बताउनुभयो । उनलाई असोज ७ गते नवलपुर जिल्ला अदालतबाट सात दिनको म्याद थप गरि थप अनुसन्धान थालिएको उहाँले बताउनुभयो । उनलाई अभद्र व्यवहार अन्तर्गत मुद्दामा अनुसन्धान गरिरहेको खाँणले बताउनुभयो ।