कावासोतीका विभिन्न ठाउँको निरीक्षण : जोखिमको पहिचान गरी नियन्त्रणको काम शुरु

दयाराम आचार्य
कावासोती । लगातारको अविरल वर्षाका कारण ठाउँ ठाउँमा डुबान र कटानको जोखिम बढेको छ । नवलपुरका विभिन्न क्षेत्रमा समेत जोखिम बढेको छ । वर्षाका कारण जोखिम बढेपछि कावासोती नगरपालिकाको नारायणी तटीय क्षेत्रको निरीक्षण गरिएको छ । कावासोती नगरपालिका १७स्थित नारायणी तटीय क्षेत्रमा नगर प्रमुख चन्द्र कुमारी पुन, प्रमुख प्रशासकीय अधिकृत यज्ञ पुरी,वडा अध्यक्ष छविलाल महतो सहितको टोलीले सो क्षेत्रको निरीक्षण गरेको हो । निरीक्षणका क्रममा अमटारीमा केही घर डुबानको जोखिममा रहेकाले सुरक्षित स्थानमा सारिएको छ । अमलटारीमा नारायणी नदीको पानी वस्तितर्फ प्रवेश गरेकाले त्याहाँस्थित एक घरलाई नजिकै रहेको सार्वजनिक भवनमा बस्नकालागि भनिएको छ ।

लगातार पानी परेमा सो क्षेत्रमा जोखिम हुन सक्ने भएपछि सबैलाई सतर्क रहन समेत नगर प्रमुख पुनले आग्रह गर्नुभएको छ । कावासोती नगरपालिका १७, अमलटारी क्षेत्रमा वडा अध्यक्ष सहित अन्य जनप्रतिनिधि, टोल समिति मार्फत सबैमा सतर्क साथ रहन सूचना प्रवाहा गरिएको नगर प्रमुख पुनले बताउनुभयो । नगर प्रमुख पुनले नदी,खोला तटीय क्षेत्रमा रहने सबैमा सर्तकताका साथ रहन आग्रह गर्नुभएको छ ।

यस्तै कावासोती नगरपालिकाको केरुङ्गे खोलाको समेत निरीक्षण गरिएको छ । कावासोती नगरपालिका –५,मा प्रमुख जिल्ला अधिकारी मनमाया पङ्गेनी सहित, नगर प्रमुख चन्द्र कुमारी पुन, जिल्ला प्रहरी प्रमुख प्रकाश मल्ल, कावासोतीका प्रमुख प्रशासकीय अधिकृत यज्ञ पुरी, वडा नम्बर ५का वडा अध्यक्ष हरि बास्तोला सहितको टोलीले कटानको निरीक्षण गरेको हो । सो क्षेत्रमा केरुङ्गे खोलाको ड्याम भत्कन केही भाग मात्रै बाँकिरहेको यसले जोखिम बढाउन सक्ने भएपछि यसको नियन्त्रणकालागि समेत काम थालिएको छ । खोलालाई च्यानेलाईज गरी कटान रोक्नकालागि कार्य शुरु गरिएको नगर प्रमुख चन्द्र कुमारी पुनले बताउनुभयो ।