नवलपुरमा कोभिड विरुद्धको खोप लगाउन शुरु : डा. गोपाल खनाललाई पहिलो खोप

दयाराम आचार्य
डण्डा । नवलपरासी (बर्दघाट सुस्तापूर्व ) नवलपुरमा आज देखी कोभिड -१९ विरुद्धको खोप लगाएन सुरु गरिएको छ । जिल्लाको मध्यविन्दु जिल्ला अस्पताल डण्डामा आज अस्पताल व्यवस्थापन समितिका अध्यक्ष डा. गोपाल खनाललाई पहिलो खोप लगाउदै खोप अभियानको शुरु भएको छ । सरकारले कोभिड- १९ विरुद्धको खोप ल्याएसँगै जिल्ला जिल्लामा खोप अभियान शुरु भएको हो ।
नवलपुरका लागि पहिलो चरणमा एक सय १७ भायल खोप आएको छ । एउटा भायलमा दश डोज हुने भएकाले एक हजार एक सय सत्तरी डोज खोप आएको जिल्ला स्वास्थ्य कार्यालय नवलपरासी (बर्दघाट सुस्ता पूर्व) नवलपुरका प्रमुख केशव प्रसाद चापागाईले बताउनुभयो । खोप प्रयोगका क्रममा १० प्रतिशतको हाराहारीमा नष्ट हुन सक्ने भएकाले प्राप्त खोपबाट करिब एक हजार ५० जनालाई लगाउन सकिने प्रमुख चापागाईले बताउनुभयो । पहिलो चरणमा स्वास्थ्यकर्मी, महिला स्वास्थ्य स्वयम सेवीका, स्थानीय तहका सरसफाई कर्मी, एम्बुलेन्स तथा शव वहान चालक, शव व्यवस्थापनमा खटिने सुरक्षाकर्मी,वृद्धा आश्रममा रहेका जेष्ठ नागरिकलाई खोप लगाइने छ ।
पहिलो चरणमा जिल्लामा खोप लगाउन नामावली टिपाउनेहरुलाई पुग्ने गरी खोप आएको छ । यस पछिको चरणमा जेष्ठ नागरिक र सूरक्षाकर्मीहरुलाई खोप लगाइने छ ।
जिल्लामा करिब २५ सय कोभिड संक्रमित रहेका छन् जसमा सक्रिय संक्रमितको संख्या हाल करिब १० जना रहेको स्वास्थ्य कार्यालय प्रमुख चापागाईले बताउनुभयो ।
पहिलो चरणमा जिल्ला अस्पतालबाट खोप केन्द्र स्थापना गरी लगाउन सुरु गरिएको र यसपछि समुदाय स्तरसम्म पनि जाने जिल्ला अस्पतालका मेडिकल सुपरिटेन्डेण्ट डा. शुनिलराज गौतमले बताउनुभयो ।
खोप परीक्षणपश्चात आएकाले यसको प्रयोगमा डराउनु नपर्ने जिल्ला अस्पतालका सुपरिटेन्डेण्ट डा. गौतमले बताउनुभयो । कुनै पनि खोपहरुमा केही सामान्य प्रभाव हुने भएपनी यस कोभिड- १९ विरुद्धको खोप प्रयोगमा कुनै खतरा नभएको र फाइदा नै धेरै भएकाले कोभिड- १९ रोकथामलाई सहयोग पुग्ने उहाँले बताउनुभयो ।

सरकारले खोप पहिलो चरणमा खोप अभियान शुरु गरेको र थप खोप खरिद गरी सबैलाई लगाउने गरी अघि बढेको निवर्तमान सांसद तिलक महतले बताउनुभयो । यो बीचमा स्वास्थ्यर्की, सूरक्षाकर्मी, अग्रपंक्तिमा रहेर कोभीड १९ रोकथाममा भूमिका निर्वाहागर्ने सबैमा उहाँले धन्यवाद दिनुभयो ।

गण्डकी प्रदेश सभा सदस्य विष्णु प्रसाद लामिछानेले कोभिड- १९ रोकथाममा स्थानीय तहले खेलेको भूमिका सराहनीय रहेको बताउनुभयो । अहिले पहिलो चरणमा खोप लगाउने क्रमसँगै छुटेका सबैलाई धैर्य गरेर बस्न आग्रह गर्नुभयो । नेपाल सरकारले ठिक समयमा कोभिड विरुद्धको खोप ल्याएको भन्दै यसको थप व्यवस्थापन सरकारले गर्दै जाने बताउनुभयो ।

प्रमुख जिल्ला अधिकारी मनमाया पंगेनीले कोभिड विरुद्धको खोप लगाउने अभियान शुरु भएपनी स्वास्थ्य सजगता अपनाउन भने छोड्न नहुने, भीडभाडमा नजाने र सरफाईमा ध्यान दिने गर व्यक्तिगत रुपमा समेत फाइदा पुग्ने बताउनुभयो ।

पहिलो खोप लगाउनुहुने जिल्ला अस्पतालका अध्यक्ष डा. गोपाल खनालले यसको प्राविधिक कुरालाई ध्यानमा राखि स्वास्थ्यकर्मीहरू खोप लगाउन आफ्नो क्षेत्रमा खटिनुपर्ने बताउनुभयो ।