ढल प्रशोधन नगरी सिधै नारायणी नदिमा

चितवन। नारायणगढ बजारको ढल बिना प्रशोधन सिधै नारायणी नदीमा फालिएको छ ।

उद्योग वाणिज्य संघले चितवन महोत्सव गर्न लागेको नदी किनारको उत्तरपट्टिको क्षेत्रमा सात ठाउँबाट ढल सिधै नदीमा मिसिने गरेको छ । यसरी ढल फालिँदा नारायणी नदीको अवस्था पनि सिधै काठमाडौँको वागमती नदीकै अवस्थामा पुग्न सक्ने भन्दै वातावरण संरक्षकहरुले चिन्ता व्यक्त गरेका छन् ।

सरसफाइ अभियानमा निरन्तर जुटिरहेका चितवनका प्रदेश सांसद विजय सुवेदीले सबै एरियामा ट्रिटमेन्ट प्लान्ट नभएकोले ढल सिधै नारायणीमा मिसिएको भन्दै चिन्ता व्यक्त गरे । उनले नयाँ ट्रिटमेन्ट प्लान्ट बनाउनको लागि कानुनी हिसाबले महानगरले ध्यान दिनुपर्ने बताए । नदीमा ढल बग्न नदिनका लागि सम्पूर्ण उपायहरु अपनाउने काम महानगरपालिकाको नै भएको उनले बताए ।

त्यस्तै, महानगरका वरिष्ठ इन्जिनियर विराट घिमिरेले महानगरपालिकाले भन्दा पनि आम उपभोक्ताको लापरबाहीले ढल सिधै नदीमा मिसिएको बताए । त्यो ट्रिटमेन्ट प्लान्ट ढल फाल्नको लागि भन्दा पनि आकाशको पानीको शुद्धिकरणको लागि बनाइएको उनले जानकारी दिए । उनले आफ्नो क्षेत्रको सरसफाइबारे स्वयं स्थानीय नागरिकनै सचेत बन्नुपर्ने विचार राखे । यसमा महानगरपालिकाको केही दोष नभएको उनको भनाइ थियो । स्थानीय पूर्णिमा श्रेष्ठले भने महानगरपालिकाको बेवास्ताको कारणले नदी किनारा प्रदूषित बन्दै गएको बताइन् । आज सोमबार भएको नदी किनारको सरसफाइमा शहरको ढल मात्र नभएर अस्पतालको सिरिन्ज लगायतको फोहोर पनि नदी किनारमा भेटिएको उनले बताइन् । नदी किनारमा बसेका स्थानीयले नदी किनारको सरसफाइको जिम्मा महानगरको भए पनि उनीहरुले फोहोर व्यवस्थापनमा अनुगमन र नियन्त्रण गर्न नसक्दा यो समस्या आएको बताए ।

narayanionline.comमा समाचार छ।