यही वर्षभित्र मेरो स्वयम्बर :कोमल वली !

काठमाडौं : राष्ट्रिय सभाकी सांसद कोमल वलीले आफ्नो सन् २०१९ भित्रै स्वयम्बर हुने खुलासा गरेकी छन्। मंगलबार रिपोर्टर्स क्लब नेपालमा गुरु मञ्जरी ग्रुपद्वारा सञ्चालित ‘माइस्वयम्बर डटकम’को उद्घाटन गर्दै वलीले यस्तो बताएकी हुन्। उनले भनिन्, ‘स्वयम्बरको खोजीमा रहेकी मान्छेले नै माइस्वयम्बर डटकम सार्वजनिक गर्नुपरेको छ, यही वर्षभित्र मेरो स्वयम्बर भेटिन्छ कि क्या हो? २०१९ को पहिलो दिनमा माइस्वयम्बर डटकमको उद्घाटन गरेकी छु, यो साल वर भेटिने छ। मेरो पनि यही साल स्वयम्बर हुन्छ।’ सांसदले यसो भनिरहँदा उपस्थितिका तर्फबाट शुभकामना र ताली बजेको थियो। सांसद वलीले हिन्दु धर्म वैज्ञानिक रहेको बताएकी छिन्। उनले भनिन्, ‘हाम्रो हिन्दु धर्म विज्ञानभन्दा पनि अगाडि छ। हाम्रो संस्कृति, हिन्दु धर्म विज्ञानमा आधारित छ, विज्ञानभन्दा पहिले छ, हामी नेपाली हिन्दु महिला मंगलबार व्रत बस्छौँ, हिन्दु परम्पराले शरीरलाई स्वस्थ र मजबुद बनाउँछ भन्ने छ, हालै नोवेल पुरस्कार विजेताहरूले गरेको व्यापक अनुसन्धानले १५/१५ दिनमा एकचोटी भोको बस्दा शरीरलाई फाइदा हुने विश्वलाई जानकारी दिए, तर हाम्रो देशमा त यो प्रक्रिया धेरै लामो समयदेखि चल्दै आएको कुरा हो नि!’ आज टोपी दिवस परेको सुनाउँदै उनले आफ्नो संस्कारलाई बचाईराख्नको लागि सबैले प्रयास थाल्नुपर्ने बताएन्। उनले भनिन्, ‘हिन्दुधर्मको मान्यताअनुसार जोडिएका सम्बन्धहरू सहजै टुट्न गाह्रो हुन्छ, यज्ञ र मण्डपमा अग्निसामु हिन्दु कर्मकाण्डबाट विवाह गरिन्छ, आजकै दिन माइस्वयम्बर डटकम उद्घाटन गर्नुपर्‍यो।’ सांसद वलीले नेपाली हिन्दु उदार भएकाले विश्वका संस्कृतिलाई सहजै स्वीकार गर्न सकेको बताइन्। उनले भनिन्,‘हामी नेपालीहरु उदार छौँ, हाम्रो मन विशाल छ, त्यसैले क्रिसमसमा रमाउँछौँ, दशैं मनाउँछौँ, आज अंग्रेजी नयाँ वर्ष हो, विश्वसँग नेपालीहरु जोडिएका छन् भन्ने सन्देश त हो। तर, हाम्रो नयाँ वर्षलाई कसले मान्छ र? अरू कसैले त मान्दैन, तर अर्जेन्टिनाका खेलाडी लियोनल मेस्सीले दशैंको अवसरमा शुभकामना दिएका थिए, त्यो सकारात्मक छ।’ त्यस्तै कार्यक्रमका सभापति तथा माइस्वयम्बर डटकमका नेपाल संयोजक मुकुन्द शर्माले नेपाली संस्कृति र पहिचान विश्वकै उत्कृष्ट तथा वैज्ञानिक भएको दाबी गरे। आफूहरूले आज उद्घाटन गरिएको ‘अनलाइन–पोर्टल’ नेपाली हिन्दुको विवाहलाई टार्गेट गरेको पनि उनले सुनाए। उनले थपे, ‘वैद्धिक परम्परा जगेर्ना गर्नुका साथै जीवनयापनका क्रममा आइपर्ने धार्मिक अनुष्ठानलाई सहज र सरल बनाउने, सुखमय दाम्पत्य जीवनलाई सहज बनाउने, ज्योतिषी परामर्श दिने, वास्तु परामर्श तथा विभिन्न धार्मिक कर्मकाण्ड गर्न सहयोग पुर्‍याउने यसको मुख्य उद्देश्य हो।’ उनले स्वयम्बरमार्फत विवाह गर्न चाहने विश्वभरी छरिएका नेपालीहरूको वैद्धिक सनातनी परम्पराको निरन्तरता कायम राख्दै आफ्नो आर्थिक अनुकुलतामा धार्मिक, सामाजिक, साँस्कृतिक रितिरिवाज र परम्पराकासाथै आफ्नो चाहनाअनुसारको योग्य वर वा बधुलाई मिलनका लागि उपयुक्त प्लेटफर्म तयार गरी मिलन गराउनु नै संस्थाको उद्देश्य रहेको बताए। उनले विश्वभरि छरिएर रहेका नेपाली गुरु, पुरोहित र हिन्दु धर्मका अभियन्ताहरूको संयुक्त पहलमा यो सुरु गरिएको पनि स्पष्ट पारे।

बाट  thahakhabar.com