नारायणी दिब्य धामको १०८ जलधारामा स्नान

आदर्श सुशिल
देवचुली । नवलपुरको देवचुली नगरपालिका १ केउरेनीको नारायणी नदि किनारमा रहेको नारायणी दिब्य धाममा १०८ जलधाराको स्नान गर्न सकिने भएको छ । नारायणी दिब्य धाममा निर्माण गर्दै गरिएको १०८ जलाधारामा सोमबार नारायणी नदीको जल पाइप मार्फत ल्याई परिक्षण गरि सञ्चालन गरिएको हो । अब त्यस क्षेत्रमा जलधारा मार्फत स्नान गर्न सकिने छ । हाल नारायणी दिब्य धाममा करिब १२ कठ्ठाको क्षेत्रफलमा बिष्णु पन्चायन मन्दिर,होमन कुण्ड,१०८ जलधारा,धर्मशाला,क्रियापुत्री घर,वृद्द सेवा सदन निर्माण भैरहेको छ । साथै त्यहाँ शौचालय सहित पुजारी घर पनि निर्माण गरिने नारायणी दिब्य धामका अध्यक्ष तिल प्रसाद पाठकले बताए ।
दिब्य मध्यवर्ती सामुदायिक वन नजिकै रहेको दिब्यधामको निर्माणसँगै यहाँ आउने आन्तरिक पर्यटक र धार्मिक पर्यटकको संख्यामा पनि वृद्धि हुने उनको बिश्वास रहेको छ । फाल्गुन १५ गते सम्म निर्माण कार्य सम्पन्न गरिसक्ने दिब्यधाम समितिको भनाई रहेको छ । गत आश्विनमा शिलान्यास गरिएको सो धामको नजिकै हरेक बर्ष हरिबोधनी एकादशीमा भब्य मेला लाग्ने गर्छ ।